Lima ka minuto nga bomba
Nahagsa ang mga Sugboanon nga nag-atang sa pagtambong ni kanhi Cebu City Mayor Tommy Osmeña sa public hearing sa House quad-committee gahapon sa buntag. Wala magsugod sa gitakdang oras ang ika-unom nga hugna sa imbestigasyon sa koneksiyon sa POGO, illegal drugs ug extrajudicial killings ug nahiagom sa naandan nga libut-libot sa mga kongresista.
Maayo na lang nga ang naghinam-hinam nga mga Sugboanon wala dayon mobiya sa pagtan-aw. Kay gi-premyohan ang ilang pailob. Human sa kapin sa tulo ka oras, gihatagan og higayon si Osmeña paghatag sa iyang mensahe sa komitiba.
* * *
Lima ra ka minuto ang gikinahanglan ni Osmeña pagbisto sa kasayoran (ubang mga dokumento) nga magamit sa komitiba:
Gipasabot nga dili tinuod ang pangangkon ni Koronel Royina Garma nga gisupak ni Osmeña ang iyang pagkatudlo sa Cebu City Police Office (CCPO) tungod sa personal nga rason; kon dili tungod kay
Nakadawat si Osmeña og pormal nga reklamo nga sa dihang hepe pa sa Criminal Investigation and Detection Group (CIDG) sa Central Visayas si Garma nagdawat og usa ka milyon ka pesos kada semana gikan sa Philippine Charity Sweepstakes Office (PCSO).
* * *
Ang tumoy sa kasayuran ni Osmeña nakapakurat sa mga kongresista. Giila ni Osmeña ang bagman ni Garma sa kuwarta sa PCSO nga si “SPO4 Art.” Nga gituohan sa mga kongresista nga mao si SPO4 Art Narsolis, ang giangkon ni Garma nga iyang uyab nga minyo sa nadestino pa sa Davao.
Si Narsolis gilambigit sa pagpatay sa tulo ka konbiktadong Chinese drug lords sa Davao Prison and Penal Farm niadtong Agosto 2016. Hangtod karon wala pa pakita si Narsolis sa quad-comm.
* * *
Gihangop ni Osmeña ang imbitasyon sa quad-comm sa sunod nilang hearing nga mosentro sa extrajudicial killings. Nipasalig siya sa pag-detalye giunsa sa paggamit ni Garma ang iyang kasuod ni kanhi Presidente Rodrigo Duterte sa pagpatay, pagpriso ug paghasi ang inosente nga mga Sugbuanon.
Pero gibinlan ni Osmeña ang iyang kanhi mga kauban sa Kongreso og teaser parte sa POGO: Dunay higanteng building nga nikalit lang sa pagtuybo sa Sugbo nga gitukod sa grupo nga gidudahan nga apil sa POGO ug gipangulohan ni kanhi Presidential Assistant for the Visayas Mike Dino.
* * *
- Latest
