EDITORYAL — Kwarta sa POGO magamit sa eleksyon

Sa dili pa moabot ang 2025 mid-term elections, kinahanglang manubag na sa balaod ang mga tawong responsable aning mga Philippine Offshore Gaming Operation sa Pilipinas ilabi na sa Porac, Pampanga ug Bamban, Tarlac.

Aron maklaro sa publiko, ang POGO legal kini kaniadto busa dili dakpunon tungod duna silay permiso gikan sa PAGCOR kaniadto. Apan dili na karon tungod sa mando ni Presidente Ferdinand Marcos Jr.

Dili ang ilang operasyon ang gilutos karon sa Senado ug sa Lower House kundili ang mga ilegal nga mga nanghitabo ug gipangbuhat sa mga tawo nga nagpadagan niini ug kun kinsa ang mga nagpaluyo kanila ug ang ilang pagmaniobra sa mga proseso ug mga balaod aron sila maka operate.

Sigurado nga adunay mga dagkong opisyales sa gobiyerno kaniadto nga nalambigit niining tanan tungod kay dili ni sila maingon niadto ka desidido sa pag-operate niini dinhi kung walay opisyales sa gobiyerno, o dili lang basta kinsa nga opisyal sa gobiyerno, nga makadupa para kanila.

Nigawas sa mga committee hearings sa parehong houses nga kaning mga ‘resources persons’ nga dunay mga giprotektahang mga tawo nga dili nila buot nganlan sa hearings.

Nasuta sab nga bilyones ka pesos ang kwartang naangkon aning mga operators nga naglambigit sab og mga Chinese nationals nga pulos kwestyonable kun asa gikan og puhonan sa pagsugod nila og negosyo dinhi.

Kahibulongan sab nga sa ilang pag-abot dinhi, kinilo na ang mga shabu nga pirmeng makuha sa mga anti-drug operations sa mga otoridad, giputos og mga Chinese tea bags ug dunay mga Chinese nationals nga nalambigit.

Naa pay human trafficking, extortion, kidnappings, ug pagpameke og mga legal nga dokumentos sa nasud.

Kinahanglang paspasan ug siguraduhong lig-on ang mga ebidensiya ug mga kaso apil na ang proteksiyon sa mga testigos sa mga kasong mapasaka unya batok sa tanang mga nalambigit nga madiskubrehan diha sa mga hearings.

Kay karong umaabot nga 2025 mid-term elections dunay posibilidad nga kining mga bilyones ka pesos nga kwartang naa ang mga tawong nalambigit, gamiton aron impluwensiyahan ang piniliay apil na ang pagpamalit og botos.   

Paniguro kini nga makadaog ang mga kandidatong mopabor kanila ug makalingkawas sila sa mga kaso.