Ulog-ulog nga usbaw

Miangkon ang mga miyembro sa Regional Tripartite Wages and Productivity Board (RTWPB) – 7 nga dili sayon ang pagkab-ot sa ilang hukom nga P33 ngadto sa P43 lang ang usbaw sa inadlaw’ng suholan sa mga mamumuo sa Central Visayas.  Mahinumduman nga nangayo ang mga mamumuo og P150 nga usbaw apan halos ika-lima lang kabahin sa giproponer sa mamumuo ang na-uyonan.  Matud pa sa akong amigo, “Ulog-ulog ra man ang gihatag sa RTWPB kay dili man gani makapalit og usa ka kilo’ng bugas ang increase.”  Fezteleern!

Dili multi-purpose ang oval

Miinsister ang contractor sa track oval sa Cebu City Sports Center (CCSC) nga dili substandard materials ang ilang gigamit sa pag-repair sa maong pasilidad.  Hangyo sa contractor nga dili unta kini gamiton alang sa mga cultural nga kalihokan tungod kay ang kalig-on sa track oval mokomplemento lang sa mga paugnat sa kusog nga aktibidades.  Bisan daw palusot lang, apan may punto ang pamahayag sa kontraktor.  Wala tinuod gidesinyo ang oval sa multi-purpose nga katuyoan.  Ni’ng maong kalamboan, daw misugyot ang kontraktor ngadto sa mga opisyales sa Sugbo nga, “Adto lage ang Sinulog ipahigayon sa SRP.”  Madahaan!

Dili advance ang traffic system

Nasuta sa mga batid sa Metropolitan Manila Development Agency (MMDA) nga ang gipangandak sa dakbayan sa Sugbo nga “most advanced” traffic light system dili diay tinuod nga advance tungod sa mga kakulangon nga nakita sa maong traffic system.  Gisugdan pagtrabaho ang maong proyekto nga nagkantidad og P480 million niadto pa’ng tuig 2020 apan wala pa mahuman hangtud karon.  Sugyot sa akong amigo, “Mas maayo pa tingale nga ang tig-taud og suga sa mga beerhouse ang gipatrabaho sa traffic system.  Dali ra kaayo nila pakidlap-kidlapon ang suga sa mga beerhouse nya barato pa og singil.”  Ateer!

Mag-zoom eating na lang

Gideklarar ni Presidente Ferdinand Marcos, Jr. pinaagi sa Memorandum Circular 64, nga suspensohon ang trabaho sa executive branch sa kagamhanan sugod sa alas 3 sa hapon karong Septembre 23 aron masaulog ang programa nga “Kainan’g Pamilya Mahalaga” diin gidasig niini ang tradisyon nga magdungan pagpangaon ang tibuok banay.  Morag gitakuban ra man sa kagamhanan ang kamatuoran nga, gawas nga walay makaon, daghan usab ang pamilya ang dili magkadungan og kaon kay nagkabuwag-buwag, tungod sa kalisod.  Tambag sa akong amigo, “Aron mahataga’g katumanan ang programa, mag-zoom eating na lang ang mga miyembro sa pamilya."  Pagkatoytoy!

Move on na lang

Mopahigayon og protesta ang mga martial law survivors ug mga human rights defenders karong Sabado, Septiyembre 21 agi og paghinumdum sa deklarasyon sa martial law sa giingon nila nga diktador nga si Ferdinand Marcos Sr., 52 ka tuig na ang milabay.  Naglibog ang akong amigo kon unsa pa man ang hinungdan sa protesta.  Matud pa niya, “Nalibkas na man ang martial law ug dili usab tataw kon unsa pa’y kalambigitan sa ilang giprotestahan sa bag-ong administrasyon. Move on na lang tingale ug mangita na lang og laing kawsa nga basehan sa protesta.” Atala lagee!