EDITORYAL - Kun uwahi na ang pahibalo

Niadtong adlaw nga Lunes, Septiyembre 16, gisuspenso sa nagkadaiyang mga local government units ang mga klase sa mga tinun-an tungod sa dautang lakaw sa panahon nga nagdala og uwan-uwan ug kusog nga hapos sa hanging habagat.

Daghan ang nihangop ilabi na ang mga ginikanan kay lagi peligro baya gyud ang panahon karon kay di matag-an kun unsay mahitabo. Apan anang adlawa, wala may hapos sa hangin ug walay uwan nga nasinati ang lapad nga bahin sa Sugbu.

Apan kagahapon, Septiyembre 17 adlaw nga Martes,  kay wa may pahibalo ang mga LGUs nibalik og eskuyla ang mga bata.

Apan buntag palang nagsige na og uwan ug kusog ang hangin unya gisungasong kini sa mga tinun-an ug mga magtutudlo.

Sa wala pa mag-alas 12 sa udto, duna nay mga LGUs nga mianunsyo nga ilang gisuspenso ang klase tungod lagi sa dautang panahon.

Apan aning mga tungora, toa na sa mga eskuylahan ang mga bata ug kuyaw na hinuon kun papaulion nga naglain naman hinuon ang panahon.

Ang resulta, dunay mga ginikanan nga naputol sa ilang mga gipangbuhat aron kuhaon ilang mga gagmay pa nga mga anak.

Ang luoy, mao ang mga ginikanan nga atoa na sa trabahoan ug walay matugon pagkuha sa ilang mga gagmay nga mga bata.

Kun ang tumong sa pagsuspenso sa klase para gyud luwas ang mga bata, mas maayo tingaling i-tayming kini sa oras nga wala pa makabiya padung sa eskuylahan ang mga tinun-an. Kay kun mauwahi na, daghan na ang mahasol.

Mao nga pwerteng daghanang mga ginikanan ang nagbagulbol diha sa social media tungod nahasol sa sistemang uwahi na kaayo ang pahibalo.