Mga kasagarang pangutana kalabot sa pangalagad sa eksorsismo ug kalingkawasan

(Ikaduhang bahin)

Susihon gyud kun suliran nga medikal ba gyud kini o dili. Hinuon dunay mga higayon nga ang yawa mahimong magpahipi mismo diha sa mga sakit. Ning paagiha kinahanglan nga dunay panagtambayayong ang mga Katolikong espesyalista ug ang eksorsista alang sa kaayohan sa pasyente kun biktima.

3.3. Pag-Ampo Alang sa Kalingkawasan

Mahimong pagaampoon ni bisan kinsa nga binunyagan segun sa ilang espirituhanon o moral nga gahom ug katungod ngadto sa butang o tawo[11] aron makalingkawas gikan sa gahom ug impluwensiya sa yawa. Mag-ampo sila ginamit ang mga pangamuyo ug pangaliya sa mga Santos, mga Angheles o ang yanong mando ginamit ang balaang ngalan ni Jesus batok sa mga dautang mga Espiritu. Ang Simbahan hugtanon kaayo nga nagdili ni bisan kinsang tawo nga walay espirituhanong gahom kanila nga gisamok sa mga daotang mga Espiritu nga mohimo sa eksorsismo, sanglit kun ugaling anaa gyud ang mga demonyo sa pasyente kun biktima ang naghimo sa eksorsismo bisan walay gahom ni katungod ang mahimong mabutang sa kakuyaw sa panimalus gikan sa mga demonyo.

4. Si Kinsa ang Katolikong Eksorsista?

Usa siya ka pari nga gitahasan sa arsobispo kun obispo sa usa ka artsidyosesis o dyosesis nga mohimo sa ritwal sa eksorsismo sa maong lokal nga simbahan ginamit ang Roman Ritual on Exorcism. Gipaabot nga pagapuy-an niya ang pagkamaki -diyosnon, kahibalo, ug kaligdong sa kinabuhi.

5. Eksorsista ba ang Tanang Pari?

Nahatag ang gahom sa paghingilin sa mga yawa pinaagi sa Sakramento sa Orden sama nga gihatag sa matag pari ang pagpasaylo sa mga sala panahon sa iyang ordinasyon. Apan aron mas hapsay ang pagdumala ning maong matang sa pangalagad, gimbut-an sa Simbahan nga motagana og mga pari aron mahimong eksorsista pinaagi sa paghatag kanila og katungod ug faculty segun sa gilatid sa Balaod Kanonikal kun Canon Law. Ang tanang mga obispo eksorsistas ug mahimo nila kining isangon ug ipaambit ngadto sa ilang kaparian. Hinuon, ang mga obispo mobansay lamang niini diha lamang sa ilang teritoryo kun ginsakopan.

6. Mahimo ba ang Usa ka Layko nga Eksorsista?

Kun maghisgot kita sa kanonikal nga mandato ang tubag DILI. Bugtong pari lamang ang mamahimong eksorsista. Hinuon ang usa ka binunyagan ang mamahimong mangalagad alang sa kalingkawasan kun Deliverance Minister diha sa simbahang lokal o Parokya uban ang paggiya sa Obispo o pari. Ang simbahan niangkon nga dunay mga tawo nga gigasahan sa Espiritu Santo nga makahingilin sa mga demonyo ug uban pang mga gasa. Kining maong mga karisma napatik ug nasinati man diha sa anib sa kasaysayan sa atong pagkasimbahan. Ang mga sanglitanan sa mga santos diha sa atong kasaysayan nga nakahingilin sa mga dautang mga espiritu bisan pa man kun dili mandato ang ilang pagka eksorsista. Ang mga sanglitanan nila ni: San Benito sa Nursia, Sto. Domingo de Guzman, San Vicente Ferrer, Santa Catalina sa  Siena, Santa Teresa sa Avila, San Juan dela Cruz, Santo Padre Pio sa Petrelcina. Ang Simbahan pinaagi sa gahom nga gihatag ni Kristo Jesus ang bugtong dunay katungod sa pagtino kun ang maong gahom nga nahuptan sa tawo sa paghingilin sa yawa iya ba sa Ginoo o gikan ba hinuon kini sa laing tinubdan nga dili iya sa Ginoo.