Inhustisya gipaklaro sa Kongreso

Labihang sukoa sa mga kongresistang miyembro sa House Committee on Appropriations nga gipangulohan ni Chairman Rep. Elizaldy ‘Zaldy’ Co ug Vice Chairperson Rep. Stella Luz Quimbo, kinsa nag-andam na daag daghang pangutanang igbubunal ngadto sa wala motungha nga Vice President Sara ‘Inday’ Z. Duterte alang sa ikaduhang 2025 Office of the Vice President (OVP) Budget hearing sa miaging September 10, 2024. Niining pagpalta ni Inday, diin sila ra usab mga kongresista maoy hinungdan sanglit 2022-2023 confidential funds ra gihapoy hisgutan bisag wala na kini sa linya, seguradong isingit gihapon sa mga gahi’g ulo kay ilang tuyo nga mabitik si Inday sa giandam nilang lit-ag, husto ra gyod ang gihimo sa bise-presidente.

Sa first hearing, tanan nilang pangutana natubag man niya. Wala lang makaayon ang mga natulalang kongresista sa tinubagan ni Inday kay mao man kini nakaguba sa gihuptan nilang script. Ug napakyas sila sa pagpisak sa intelihenting bise-presidente.

Ikaduha, sa usa ka press conference, gibulgar ni Inday nga ang nagdala sa budget sa atong gobiyerno duha ra ka abusadong tawo: si House Speaker Martin Romualdez ug si Rep. Zaldy Co, kinsa maoy gipaka-Ginoo sa Kongreso ug authors nga ipa-impeach si Inday. Busa, unsa pay kapuslanan sa iyang pagtambong sa second hearing kon ang nagkontrol sa budget kini rang mga tawhana? Aron lang imasaker siya sa mga pang-impeach pangutana sa mga itoy nila Martin-Bongbong-Liza?

Hinuon, may mga kongresista pang tarong-ligdong-kasaligan. Ug usa na si Rep. Rodante Marcoleta, kinsa mipahinumdom ni Quimbo ug sa tanang miyembro sa committee, nga nahimo nang tradisiyon sa kamara ang paghatag og parliamentary courtesy ngadto sa duruha ka kinatas-ang lider sa nasud: Presidente ug Bise-Presidente pinaagi sa pag-aprobar gilayon sa tinuig budget alang sa tagsatagsa nila ka opisina.

Kon ang 2025 P10.5B Office of the President proposal budget, walay Bongbong Marcos nga mitambong ug wala abtig 15 minutos giaprobahan dayon, nganong dili man nila hatagan og susamang treatment ang OVP? Nganong gipiit man nila pag-ayo si Inday? Kini nagpaklaro lang, nga ang gipraktis sa Kongreso ubos sa administrasiyong Marcos, dili ang patas nga pamalaod. Kondili, inhustisya!

Haskang luoya nato, sa? Hangtod kanus-a kaha matapos kining atong pag-antos? Only God knows!