Sunod nga masuspenso
Gitakdang taktakon ang pangulo sa usa ka ahensiya sa gobiyerno nga nagbase sa Sugbo. Dili siya ingon ana ka-ilado. Wala gani nahibawo, ug nagsusi, sa iyang katakos sa pagdumala sa ahensiya. Mao tingali nga wala mabalita ang nag-ung-ong nga pagkalagpot niya sa puwesto.
Pero rekomendado siya og gamhanan nga politiko. Maong walay naglangas sa kalit niyang promosyon. Gikan sa gamayng puwesto nga gihuptan kaniadto. Tangtangon siya sa walay pagkonsulta, o bisan sa kahawod, sa iyang amo. Mao nay pabilo ning istoryaha. Mahimong pasiuna sa dakong lahugay sa politika sa Sugbo.
* * *
Walay mangahas sa pagpanghilabot sa politiko sa Sugbo. Bisan pa sa tanan niyang paukyab. Bisan pa sa pagsige og wara-wara sa iyang kahawod. Tanang nisuway sa pagbadlong sa mga pangabuso nahiagom sa iyang kabangis.
Kurog niya ang hapit tanan nga nasudnong mga politiko. Kay kanunayng gihudlat sa matag higayon nga nakalimot sila sa iyang ka-importante. Gipahinumdoman nga kapin sa tulo ka milyon ang rehistradong mga botante sa Sugbo. Ug gipatuo nga, bisan sa kadaghan sa mga ligdong ug utokan sa Sugbo, siya ray magbuot kinsay botaran sa mga Sugboanon.
* * *
Maong daghang nakugang nganong patiran ang usa sa iyang mga pinahimutang sa puwesto. Kon dunay seryusong atraso ang bata-bata, gipahibawo unta siya ug gipalihug sa pagtabang pagpangita og ikapuli.
Wala na ba mahadlok ang administrasyon niya? Napuno na ba sila sa iyang mga salida? Nakahukom na ba sa pagpahimutang niya sa tukmang luna? Nakumbinser na ba nga dili diay ingon ana kadako, ug busa dili na kinahanglan nga luhud-luhoran, ang iyang impluwensiya?
* * *
Abunda ang mga pangagpas nganong nikalit lang og ka-aslom ang Malakanyang sa lokal nga politiko. Tingali nasobrahan ra ang gipasangil nga anomaluso nga mga transaksiyon. O tingali dunay dako og kalyo, nga suod sa palasyo, nga natamakan sa walay kinutoban nga pamintaha.
Labing katuohan nga katin-awan nanukad sa ka-insecure sa administrasyon. Nga nagpakita og timaan nga dili makapasaylo ni bisan kinsa nga gidudahang tua kapusta sa pikas. Ang politiko gikataho nga nisuway sa pagdupa sa mayor nga ilang gigukod. Ug dunay paryente nga nilusad og negosyo nga ang kinadak-an nga ka-sosyo nga mga negosyante labihan kasikit sa, nakatag-an ka, mga Duterte.
* * *
- Latest
