EDITORYAL - Unsay kalainan sa nadakpan sa nitahan?

Dunay mga netizens ang mi-react bahin sa balitang nadakpan na si KOJC doomsday evangelist Apollo Quiboloy didto sa iyang compound sa Davao niadtong Domingo sa hapon. Makadaghan na kining nahitabo sa uban pud nga mga kaso sa mga pinangita sa balaod.

Ilang giinsister nga wala dakpa kondili boluntaryong mitahan sa iyang kaugalingon ang wanted sa balaod tungod sa patong-patong nga mga kaso nga si Quiboloy.

Gani mao sab kini ang gipamahayag sa abogado ni Quiboloy nga si Ferdinand Topacio, nga nitahan sa AFP ug wala madakpi sa PNP ang iyang kliyente.

Gisaway sab ang media tungod kay wala klaroha nga sa Armed Forces of the Philippines ug dili sa Philippine National Police nitahan ang pastor.

Apan si Presidente Ferdinand Marcos Jr. mipasabot nga nadakpan gyud si Quiboloy ug dili kadto matawag nga voluntary surrender tungod kay gikonsiderar kadto nga ‘police work’ o ‘police operation’ gihapon sanglit nag-serve og warrant of arrest.

Matud sa presidente ang presensya sa AFP didto pag- abag para sa PNP sanglit way salig ang pastor sa naulahi, ug labaw sa tanan para kini sa malinawon nga pagresolba sa standoff tali sa mga polis ug supporters sa suspek.

Unsa man diay ang kalainan sa nitahan ug sa nadakpan nga pareho raman gihapon ang padulngan sa suspek, ang pagka detiner sa karsel.

Ug ning tungora, ang kapolisan man gihapon ang nagdetiner kaniya samtang paabuton ang proseso sa iyang mga kaso.

Si Quiboloy nagatubang og patong-patong nga mga kaso karon dili lang dinhi sa Pilipinas kondili hasta pud sa Amerika may kalabotan sa kalihokan sa iyang gimugna nga simbahan nga gipasanginlang nalambigit sa human trafficking, sex trafficking, bulk cash smuggling ug uban pa. Duna say purohan nga si Quiboloy i-extradite ngadto sa Amerika, depende na kini sa Department of Justice dinhi sa Pilipinas kun itugot ba nila kini.

Kaning pagkasikop o pagtahan ni Quiboloy maghatag kini og oportunidad kaniya nga depensahan ang iyang kaugalingon sa saktong lugar sama sa korte, nga ipamatuod nga inosente gyud siya sa mga gipasangil nganha kaniya.

Dili man mahimong adto lang sa social media lutoson o dunggon ang kaso, kinahanglan gyud nga sa korte kini buhaton aron patas ang tanan.