Sikit diay sa mayor?

Usa sa mga ebidensiya nga nasakmit sa mga awtoridad dihang ilang gironda ang Tourist Garden Hotel diha sa Barangay Agus mao ang City Hall ID nagpakita nga ang giingong "big boss" sa illegal nga POGO nga si Zhao Shouqui nagsilbing consultant ni  Lapu-Lapu City Mayor Junard "Ahong" Chan.

Sigun sa ID, si Zhao consultant ni Chan alang sa promotion sa  negosyo sa mga Insik diha sa syudad.

Dali hinuon nga gihimakak ni Chan nga iyang consultant si Zhao. Matud sa mayor peke ang ID nga nasakmit sa mga sakop sa NBI ug Presidential Anti-Organized Crime Commission (PAOCC) ug iya ning ipasusi.

Gipasabot ni Chan nga di sila moisyu og ID sa mga consultant sanglit di sila maisip nga kawani sa syudad.

Matud ni Chan nga posibling nagbuot-buot og pabuhat si Zhao og ID aron gamiton pagpatuo nga duna siyay koneksiyon.

Sa usa ka negosyanteng adunahan nga tag-iya og resort, dili ba kataw-anan nga magpahimo og peke nga ID aron lang ingnon nga duna siyay koneksiyon?

Gawas pa wala man tingali magkinahanglan og peke nga ID ang usa ka inilang negosyante sa iyang dakbayan aron lang magpatuo nga siya dunay impluwensiya.

Ang tinuod kaila nang daan si Zhao ug si Chan tungod kay isip pangulo sa Chinese Business Guild sa Lapu-Lapu usa siya sa mga benefactor sa syudad.

Gani makadaghang higayon gipasalamatan ni Chan si Zhao pinaagi sa iyang public post sa social media tungod sa mga donasyon niini ngadto sa syudad.

Niadtong Sept. 19, 2019, gipasalamatan ni Chan si Zhao sa iyang post sa Facebook  tungod 22 ka unit sa computer nga gidonar niini ngadto sa dakbayan.

Niadtong Feb. 13, 2020, gipasalamatan na usab ni Chan ang  Chan ang Lapu-Lapu City Chinese Guild gipangulohan ni Zhao tungod sa laing 18  ka computer units nga gidonar niini alang sa Lapu-Lapu City Police Office ug Pangan-an Elementary School sa Olango Island.

Niadtong Nov. 28, 2020, gipasalamatan usab ni Chan ang Tourist Garden Hotel,  Lapu-Lapu City Chinese Guild ug ubang mga negosyante tungod sa upat ka solar panel nga ilang gidonar ug tulo ka computer units alang sa mga tunghaan sa dakbayan.

Ug ambot sulagma ba lang nga human mimando si Presidente Marcos atol sa iyang SONA pagpahunong sa tanang POGO operation sa nasud, labihang dalia nakaingon ni Chan nga way POGO sa iyang syudad.

Ang kapolisan miisyu sab og certification nga way nag-operate nga POGO sa Lapu-Lapu. Mas nahibawo pa ang mga awtoridad sa Indonesia nga maoy naghatag og impormasyon sa PAOCC ug NBI hinungdan nga nahitabo ang pagpangronda.

Leksiyon ni sa ubang mga local chief executive, susiha ninyo og maayo ang background sa mga negosyante nga mosikit ug modonar ninyo kay basin gikan sa illegal nga operasyon ang kwartang ilang gigamit.