Pakugon ang ulo

Nanawagan si kanhi Senador Panfilo Lacson Bangko Sentral ng Pilipinas (BSP) nga gawas sa pag-terminate sa ilang kontrata, angayan nga pahamtangan usab og silot ang AllCard, Inc. (ACI), ang kontraktor sa nga gitahasan pagbuhat sa National ID cards.  May punto ang panawagan ni Senador Lacson.  Apan alang sa akong amigo, dili kay ACI lang ang manubag ug silotan kon dili lakip na usab ang BSP kinsa mitugot sa mga kapalpakan sa kontraktor sulod sa dugay’ng panahon.  Matud pa sa akong apohan kon mag-away na gani kaming managsoon, “Kaayo ra pakugon na’ng inyong duha ka ulo.” Ateer!

Gipanag-iya ni Quiboloy

Giawhag sa Chinese coast guard ang Pilipinas nga hunongon na niini ang pagpadala og mga supply mission sa nasangad nga barko didto sa giilogan nga Sabina Shoal sa South China Sea aron malikayan ang dili maayo’ng mga panghitabo.  Nahisama ang China sa tawo nga nagdili sa iyang mga silingan sa pag-agi sa luna bisan kon gilalisan pa sa husgado ang tinuod nga tag-iya niini.  Apan alang sa akong amigo, “Dili angay maglalis ang Pilipinas ug China sa Sabina Shoal kay matud pa ni Pastor Quiboloy, siya man maoy tag-iya sa tibuok kalibutan.” Fishkots!

Impeachment batok ni Sara

Alang kang Kongresman France Castro, ang pag-isyu sa COA og Notice of Disallowance sa P73M nga confidential funds ubos sa 2022 budget sa Office of the Vice President igo na’ng basehan sa pag-impeach kang VP Sara Duterte. Mahimo pa’ng i-apelar sa korte ang Notice of Disallowance busa dili pa tingale kini hinog nga basehan para sa impeachment.  Bisan gani si Kongresista Castro konbiktado na man sa korte apan gi-apelar pa niya ang iyang kaso.  Haum ang pahimangno nga, “Sa pag-akusar nimo sa usa ka tawo, gipunting nimo ang imong usa ka tudlo ngadto kaniya, apan ang tulo mo usab ka tudlo nagpunting padung kanimo.” Saoonz!

Dili gamiton ang permit

Dul-an sa 30 ka commercial establishments ang wala pa makatuman sa mando sa kagamhanan sa pag-guba sa ilang mga struktura kay nasulod man sila sa gilatid nga 3-meter easement diha sa Estero de Parian sa may downtown sa Cebu City.   Kinahanglan ang kooperasyon sa hingtungdan’g establisemento aron masulbad ang suliran sa baha busa dili na lang unta nila gamiton isip rason ang construction permit nga gihatag kanila sa kagamhanan kaniadto, kon aduna man.  Kay sa tinuoray lang, dili nila mahimong ibandera ang ilang construction permit ngadto sa nagpungasi nga baha sa pamasin nga likayan sila niini.  Madahaan!

Wala Magkatukma

Miluwat og kamanduan si Agriculture Secretary Francisco Tiu Laurel Jr. ngadto sa mga rice importer sa pag-gamit na sa Sanitary and Phytosanitary Import Clearance (SPISIC) nga gihatag ngadto kanila sulod sa 60 ka adlaw kon dili sila buot mapahamtangan og sanction.  Tataw nga wala magtukma ang katuyoan sa gobyerno ug sa mga rice importer ni’ng kahimtanga.  Makapahinumdum sa akong amigo nga nasayop pagsakay sa eroplano kay inay padulong siya sa Bohol, ang padulong sa Dumaguete na man hinoon ang iyang nasakyan. Resulta: Wala makalarga ang duha ka eroplano kay ang usa, sobra ang pasahero, samtang ang usa, kulang ang pasahero.  Pagkatoytoy!