EDITORYAL - Tanan pwedeng mabayani

Gisaulog sa Pilipinas ang National Heroes Day kagahapong adlawa agi og pagila ug pagpalasamat sa mga sakripisyong ilang gihimo kaniadto alang sa kagawasan sa nasud nga natagamtaman karon sa mga Pilipino.

Apan tingali, naglimbag-limbag karon sa ilang lubnganan ang mga bayani tungod kay gianugonan sila sa ilang sakripisyo gumikan aning ubang mga Pilipino nga wala gamita sa maayo ang natagamtamang kagawasan.

Pwede kaayo bisan kinsa mamahimong bayani. Samtang tuod og kadaghanan sa mga bayani naila lang tungod sa ilang kontribusyon sa pagdepensa sa nasud atol sa panahon sa pagpanakop sa mga langyaw dinhi, dunay uban nakuha nila kini pinaagi sa sports sama nalang ni Carlos Yulo ug uban pang Olympian athletes sa nasud sa bag-ohay lang natapos nga Olympics sa Paris.

Dili kinahanglang mamatay sa pakiggubat o mohakot og bulawang medalya para mahimong bayani.

Ang pagkabayani naglakip sa pagpakamatinud-anong Pilipino, mahigugmaon sa nasud ug sa ilang pamilya nungka sa personal nga interes.

Kaning pagkamahigugmaon sa nasud mahimo ra pinaagi sa simpleng pagsalmot sa eleksyon sama sa pagbotar aron pagpili og bag-ong mga lider.

Apan ang pagbotar dili sa paaging nadala lang sa hulhog o nadala lang sa panon, pagpakakauwaw na kun mobotar lang tungod kay gibayran o nakadawat og sobre.

Ang mga bayani nga niula sa ilang kinabuhi para sa nasud kaniadto, siguradong naguol tungod aning klaseha sa pagbotar og kandidato. Nga dili makamaong mopili nga ang gipili nagbutang hinuon sa peligro sa nasud nga makuptan sa liog sa mga langyaw nga impluwensiya.

Samot na kun ang langyaw nga impluwensiya nakapalubog ug nakapahanap sa mga mata sa mga lider aron sila mabutahan sa kamatuoran bisan giilog na ang mga teritoryo niini, wala gyud mobabag.

Bayani ang usa ka Pilipino kun pinaagi sa edukadong pagpili og kandidato sila mobotar, dili tungod kay nadani sila sa bulatik nga klarong pangilad sa mga kandidato.