Kinadak-an nga kulba
Hangtod sa pagtimaan sa National Heroes’ Day gahapon, hilom ang mga Duterte sa seryosong hulga nga nahiagoman sa mga tripulante sa BRP Datu Sanday sa Bureau of Fisheries and Aquatic Resources (BFAR) nga gitabangan og bangga og bombardiyo og water cannon sa walo ka barko sa China niadtong Domingo.
Labing sipa nga mensahe sa dugay nang pagpakahilom sa mga Duterte sa mas bangis ug mas agresibong mga pagpanghasi batok sa mga Pilipino mao nga tua sila kapusta sa China nga naghigwaos sa pag-ilog sa atong teritoryo sa West Philippine Sea.
* * *
Hangtod sa akong pagsuwat ini, wala pa gihapon silay mensahe sa pagsimpatiya, bisan ulog-ulog na lang, sa mga bata ug mga babaye nga mga sakop sa Kingdom of Jesus Christ nga nipasangil nga gilugos, giabusohan, gidagmalan ug gipanguwartahan ni Apollo Quiboloy.
Labing klarong mensahe sa ilang pagkondenar sa kapolisan nga nipatuman sa legal nga sugo sa korte pagdakop nilang Quiboloy ug ubang mga sinumbong aron patubagon sa mga pasangil batok nila mao nga gipili nila ang pagdupa sa gipasanginlang bangis nga mga kriminal kay sa makaluluoy nilang mga biktima.
* * *
Laing mensahe sa mga Duterte: Dili sila kasukmatan bisan unsa kabinuang ang pagdapig sa mga langyaw batok sa mga Pilipino ug sa gipasanginlang rapist batok sa mga biktima tungod sa kadaghan sa mga dumadapig nga motuman bisan unsay ilang isugo.
Gitawag nilang People Power 3 ang tapok sa ilang mga dumadapig nga nisiyagit og “Duterte! Duterte!” ug nisunog og mga ligid ug nibarikada sa nasudnong highway duol sa ilang compound. Ug nagpaabot nga mokurog sa kahadlok ang Malakanyang.
* * *
Taliwala sa tanang pasundayag sa ilang kahawod, nisiwil ang kinadak-ang kahadlok sa mga Duterte. Sa labing unang higayon sa ilang pamolitika dili sila alyado sa Malakanyang. Silay labing nasuhito nga dili hingpit ang ilang pagkontrolar sa Davao kon kontrahan sila sa palasyo.
Labing dako nilang urom, maong wala nay tarung nga kinatulgan sulod sa ilang moskitero, mao ang nag-ung-ong nga arrest warrants sa International Criminal Court tungod sa laktod nga pinatyanay sa ilang drug war. Nahibawo unsay dangatan sa dinastiya kon ang ilang pangulo mabalhog sa prisohan sa The Hague. Diin dili na magsilbi ang ilang kapating.
* * *
- Latest
