Grandstanding pa, nasibatan hinuon

Naninuod ang kagamhanan sa paggukod sa mga high-profile personality nga pinangita sa balaod ug ang labing uwahi mao ang lider sa Kingdom of Jesus Christ si Pastor Apolo Quiboloy nga mora’g maoy napahimungtan sa tanan nga kalagot human malutsi sa mga nahaunang personalidad sama nilang Arnie Teves nga nakasibat sa Timor Lesti nga hangtud karon wala pa kabalik, si Alice Guo nga nakasibat usab ug wala usab pa mabalik sa nasud.

Sa ka busy sa mga opisyal sa kagamhanan sa grandstanding sa Senado ug Ubos Balay Balauranan, wala na nila mabantayi nga nakasibat na ang mga tawo nga ilang gihimong subject sa inquiry in aid of legislation kuno.

Pastilan hilig kaayo sa pasikat ug karon gipikatan sila sa mga giisip nilang wanted mao nang natandog ang ilang garbo ug gisulong na nila ang kampo sa KOJC sa Davao.

Unsay kasegurohan nila nga naa pa sa dapit si Pastor Quiboloy?

Unsa man ni marka bahala nalang maong nigamit og hilabihan ka daghan nga pwersa sa kagamhanan aron segurado nga madakpan ang ilang gipangita nga adunay 15 milyones pesos nga patong sa ulo.

Kong mapakyas sila sa pagdakop sa pastor laing kauwawan na usab ang ihilam-os sa ilang nawong kay sa ka dako sa pundo sa intillegence nila, wala sila makahimo sa ilang tahas nga masibatan lang og pipila ka personalidad. Nagmata lang sila og buntag o natulog sila sa pansitan.

Kong aduna man gyuy lig-ong basehan sa kaso batok niining mga tawhana dili sila mag-usik og panahon sa sige og pagarpar sa publiko, unahon nila sa pagtrabaho sa hilom, palig-onon ang kaso ug kong mahinog o maluto na ang kaso ayha na nila pakuratan sa pagdakop nga dili na makasibat.

Nganong makasibat man pud kining mga tawhana? Syempre taga gobiyerno ra man pud ang naa sa likod niini kadtong mga nawong og salapi nga sama ni hudas andam budhian ang nagpakaon kanila tungod lang sa kwarta.

Sa nahitabo sa KOJC mora’g nasubrahan ra man pud sa kadaghan sa mga pwersa nga gigamit nga nisangpot gani sa pagkakalas sa kinabuhi sa usa ka miyembro sa grupo.

Samtang ugaling naa pa man ang pastor, unta siya na ang boluntaryong motahan sa balaod aron wala nay maamong nga miyembro niya, andam niyang isakripisyo ang kaugalingon tungod og alang sa iyang mga tawo. Mao kanay gitawag nga supreme sacrifices.