EDITORYAL - “Transparency initiative” gibabagan

Lisud kaayong higugmaon ang nasud, kun adunay mga opisyales sa gobiyerno nga maoy kusog momanipula sa katawhan aron sila ilaron ug himuong husto ang sayop para ra sa ilang kaugalingong interes ug dili interes sa mga Pilipino.

Ning bag-o lang, si PCG Commodore Jay Tarriela mibutyag nga adunay mga opisyales sa gobiyerno nga gikatahong supak o mibabag sa “transparency initiative” sa gobiyerno nga ibutyag ang tanang ilegal nga gipangbuhat sa China diha sa West Philippine Sea.

Wala hinuon hinganli ni Tarriela ang maong opisyal apan giingong dunay mga higayon nga kining tawhana nibabag na kaniadto ug dunay mga higayon nga gustong babagan ang pagpublikar nila sa mga dautang gipanghimo sa China sa WPS.

Si Tarriela mao ang tigpamaba sa PCG sa National Task Force-West Philippine Sea (NTF-WPS) miingon nga kining maong mga opisyal mas nagpabadlong pa ug angay pahilumon nungka aning mga Pilipinong nagpakahilom ug nagdumili pagkomento bahin sa WPS, kay kining mga opisyala   klarong adto gyud pusta sa China.

Kaning ‘transparency initiative’ sa gobiyerno gidisenyo aron ipublikar tanang mga ilegal nga gipanghimo sa China.  Wala kini mahitabo sa nakalabay nga administrasyon.

Kaabag sa gobiyerno sa maong inisyatiba ang mga sakop sa media aron mas paspas ug mas lapad ang pagkatap sa impormasyon aron masayod ang mga Pilipino sa tinuoray nga nahitabo sa WPS.

Makatabang kini sa paghulma sa opinyon ug mga polisiya sa gobiyerno pabor sa katawhan.

 Kay kaniadto, inay kondenahon ug ipublikar pinaagi sa media ang mga ilegal nga gipangbuhat sa China didto sa WPS, tak-om ang tanan.

Way kalibutan ang katawhan sa tinuoray nga nanghitabo didto, gawas lang sa mga giandam daan nga pamahayag gikan sa gobiyerno nga klaro kaayong wala magtug-an sa tinuoray nga sitwasyon.

Nahibaw-an lang tanan sa dihang nanaog na sa pwesto ang nakalabay nga administrasyon. Karon pa sa panahon ni Presidente Ferdinand Marcos Jr. nahibaw-an sa tanang Pilipino nga nakompleto na sa China ang tanang artipisyal nga mga isla sa WPS.

Mga isla nga sa pagsugod palang gibabagan na ni kanhi presidente Benigno “P.Noy” Aquino nga maoy hinungdan sa pagdangop sa Pilipinas sa International Tribunal ug  tuig 2016 gipagaws ang ruling nga nag-imbalido sa tanang pangangkon sa China sa WPS.