Gi-occupy sa mga igsuon ang prooperty sa namatay

Dear Atty. Divine,

Mangutana ko kay naay balay ang live-in partner sa akong igsuon unya kay namatay man siya, ang iyang mga igsuon nga babaye mao nay nagpuyo sa iyang balay. Naa siyay anak sa akong manghud apan dili sila kasal. Ang akong pangutana kun aduna bay katungod ang akong igsuon nga maoy mopuyo sa maong balay uban ang ilang 9 years old nga anak? Ang problema kay mga isog man kaayo ni mga igsoon sa namatay. Moingon sila nga dili daw ang namatay ang naggasto sa pagpaayo sa maong balay kay kadto daw igsuon nila nga atua sa Singapore ang naggasto apan ang mga papeles sa yuta nakapangan ni Genaro Marcellana kadtong namatay. Maski side car nga kabilin sa namatay angkunon sa mga igsoon kay wala daw naka gasto ako manghud. Unsa angay nga buhaton sa akong igsuon? Daghang Salamat. —Jessa

Dear Jessa,

Kun ang property nakapangan sa namatay, ang adunay katungod nga mo-inherit niini mao ang iyang anak. Way katungod ang mga igsuon nga mo-occupy sa maong property o sa bisan unsang butang nga kabilin niini kay ang anak sa namatay mao man ang compulsory heir. Ug tungod kay minor de edad pa ang bata, ang iyang inahan maoy morepresentar kaniya. Ang maayong buhaton sa inahan karon mao ang pag-process sa pag-transfer sa titulo sa yuta gikan sa pangan sa namatay ngadto na sa pangan sa bata isip iyang compulsory heir. Moadto siya sa abogado aron sa pagpahimo og dokumento alang niini. Mamahimo sab nga ipatawag sa barangay ang mga igsuon sa namatay nga maoy nag occupy karon sa property aron sila papahawaon kay wa man silay katungod sa maong property. Thank you and God bless. Atty. Divine

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.