Gipapatay ni Digong?

Duha ka kanhi mga piniriso sa Davao Prisons and Penal Farms mipasangil nga si kanhi Presidente Rodrigo Duterte maoy nagsugo nga patyon ang tulo ka Chinese druglords nga napriso sab sa Davao Prisons.

Ang usa sa duha ka piniriso nga miatubang sa hearing didto sa Senado mitudlo sa usa ka polis nga maoy mikontak kaniya ug mikumbinser nga mangita siya’g kauban aron patyon aron tulo ka Chinese druglords.

Isip bugti sa pagpatay nila sa tulo ka konbiktadong druglords nga mga Insik, gisaaran sila nga hatagan og P3 milyones, unya gisaaran pa gyud nga hangyoon nila ang presidente nga tabangan sila nga makagawas sa prisohan.

Sa laktud, napatay gyud nila ang tulo ka Chinese druglords nga gitabangan nila’g dunggab sulod sa ilang gibilanggoan. Nasabtan nako nga gitug-an nila ang sekreto kay wa tumana ang gisaad kanila nga hatagan sila’g kwarta, ug wa sila makagawas.

Buyno, ang ilang pamahayag nga nagbutyag nga nadunggan kuno nila si Duterte nga mitawag sa dakong opisyal sa bilanggoan ug nagpasalamat nga napatay ang tulo ka Chinese druglords, maiksip nga “hearsay.”

Mahimo tingali nga molig-on ang kalambigitan ni Duterte kon kadtong polis nga giingong maoy mikontak sa usa sa duha ka binilanggo, moangkon nga siya ang nagsugo nga patyon ang tulo ka Chinese druglords, unya si Duterte maoy utok niini.

* * *

Kon sakit man ang nahitabo ni Mayor Michael Rama nga gi-“preventive suspension” og unom ka buwan bisan og wa siya’y labot sa kaso, tan-aw nako mas sakit ang nahitabo kang Mandaue City Mayor Jonas Cortes.

Dili lang unom ka buwan, kondili, usa gyud ka tuig ang pagsuspenso sa Ombudsman kang Mayor Cortes ug silot gyud kini human siya mapamatud-i nga sad-an sa grave misconduct.

Tungod kini sa pagtudlo ni Mayor Cortes ug hepe sa Social services department diha sa Mandaue, nga gireklamo siya kay matud pa dunay nahimo niyang kalapasan.

Pero nindot ang gihimo ni Mayor Cortes kay igo lang siya nga miingon nga himoon niya ang tanan niyang mahimo pinaagi sa mga legal remedies sa pamasin nga mabakwi ang silot batok kaniya.

Mokontak unta ko ni Mayor Cortes aron kuhaan siya sa iyang pamahayag, apan dili man motubag sa iyang cellphone, ug ang iyang city administrator, dili na sab motubag nako... ambot ngano.

Kon dili malibkas ang pagsuspenso ni Mayor Jonas, nagpasabot nga atol sa kampanya ug bisan na sa adlaw sa eleksyon, dili siya maoy mayor.

Arang-arang na lang kay kaalyado man niya ang bise mayor nga mopuli, si Glenn Vercide, nga mipasalig nga ipadayon niya ang mga programa ni Mayor Jonas.