EDITORYAL - Kinsay nitabang ni Alice Guo?
![EDITORYAL - Kinsay nitabang ni Alice Guo?](https://media.philstar.com/photos/2024/08/20/banattoon_2024-08-20_21-58-37.jpg)
Nakagawas na sa Pilipinas si suspended Bamban Mayor Alice Guo o Guo Hua Ping sa tinuod nga pangalan, usa ka Chinese national nga nalambigit sa daghang imbestigasyon sa Senado tungod sa kalambigitan sa Philippine Overseas Gaming Operation ug uban pa.
Si Senador Riza Hontiveros sa iyang post sa Facebook miingon nga nakagawas na sa Pilipinas ug atoa na karon sa Malaysia si Guo. Karon ang pangutana kun giunsa man pagkahitabo nga nakagawas siya gamit pa gyud ang Philippine Passport?
Dili man pwedeng basulon ang Malaysia tungod kay balido man ang passport nga gipresentar ni Guo. Unsa may ilang kalibotan nga ubos diay sa hold departure order sa Bureau of Immigration tungod sa imbestigasyon sa Senado si Guo? Ang abogado ni Guo namahayag hinuon nga 100 porsiyento siyang sigurado nga si Guo naa ra dinhi sa Pilipinas ug walay kamatuoran nga nakagawas na kini sa nasud. Si Guo gikonsiderar nang wanted sa balaod tungod sa pagpahamtang kaniya og contempt sa Senado human wala na siya motunga og balik sa hearing.
Gidudahan nga si Guo espiya sa China ug gituyo pagbutang dinhi aron maniid ug posibleng sabotahion ang mga kalihokan sa gobiyerno ilabi na may kalabotan sa West Philippine Sea.
Sa iyaha sang POGO complex sa Bamban nadiskubrehan ang nagkadaiyang ilegal nga mga kontrabando sama sa ilegal nga drugas ug mga kalihokan gikan sa kidnapping, torture, murder, rape ug online scamming.
Apan kun pananglitan tinuod kining nadawat nga impormasyon ni Hontiveros, basi sa nakuha niyang arrival records gikan sa usa ka Malaysian airport nga nagpakitang niabot didto si Guo niadtong Hulyo 18,2024, dako ang posibilidad nga dunay opisyal sa gobiyerno nga nitabang kaniya makagawas.
Posible nga ang mga tawong responsable nganong nakalusot si Guo dinhi sa Pilipinas kaniadto ug nakakuha og mga dokumento isip usa ka Pilipino aron makakandidato sa eleksyon ug nakadaog pa gyud, duna say kalambigitan niining iyang pag-ikyas.
Kani sang mga tawhana posible sab nga mao say responsable o naghokus-pokus aron makasulod dinhi sa Pilipinas ang daghang mga Chinese nationals apil na ang mga na-report nga mga Chinese druglords nga maoy gituohang nagdala aning mga kinilo na karon nga mga shabu sa nasud.
- Latest