Nahimong ulipon

Binasi sa Mateo 19;16-22

Dili dautan ang paghupot og bahandi labina kun imo gyud ning hinagoan.

Daghanan kanato ang buot mamahimong hamugaway sa kinabuhi labina kun maghisgot kita sa mga butang pinansiyal.

Apan sa tanto natong pangindahay niini daghanan usab ang naulipon sa maong tinguha nga tungod niini nahikalimot kita nga dunay mas mahinungdanon pa ug kini ang espirituhanong aspeto sa kinabuhi natong mga tawo.

Nagkinahanglan kita sa Dios nga maoy motagbaw kanato. Siya nagpaduol kanato kita usab nagpahilayo. Nahimo kitang ulipon sa mga butang hinatag niya alang sa ato untang kaayohan.

Sama sa batan-on ning ebanghelyo diin adunay tawo nga dunay dakong kaikag sa pagsunod kang Kristo Jesus apan nawili sa iyang bahandi.

Ang maong kawili maoy dakong babag alang sa mas hingpit pa nga kinabuhi.

Subo siya nga nitalikod binitbit ang kalibog ug kasagmuyo sanglit ang iyang dakong tinguha nga mamahimong sumusunod nababagan man sa kalibutanong kabalaka.

 Atong higugmaon ang tawo gamiton ang bahandi dili kay higugmaon ang bahandi apan gigamit ang tawo.