Bangil ra gyud intawon sa kagutom

Mapaigo ba ang P21 per meal o P64 per day sa matag tawo kong basehan nato ang datos nga gipagawas sa National Economic Development Authority o NEDA nga dili matawag nga kabus ang tawo kong adunay P64 kada adlaw nga budget sa iyang pagkaon?

Wala uroy sila malipong sa ilang gipanulti o nagutman ba kaha dihang ila kining gipagarpar atol sa hearing sa Senado.

Sakyan nato ang ilang giingon. Tinuod makapalit man ang matag usa nato og pagkaon sa ingon niini nga kantidad, sama nalang sa akong gi-expermento sa pungkopungko ni-order ko or duha ka puso nga tag singko pesos ang usa ka bolabola nga otan o gulay nga tag 10 ang usa.

Ang akong nabayad P20, ang peso nga nahabilin pwede na to ipalit og tubig nga tag piso kanang hulog hulog aron insaktong P21 ang akong nakaon. Kini kong naay mga tindahan nga nagbaligya og ingon niini nga mga pagkaon nga makapili ka apan kong wala mag nganga sa kagutom intawon.

Kini kong ready to eat ang atong paliton apan kong dili, unsa man ang mapalit nimo, dahon ra sa utanon ra man ang mapalit ani, mogasto pa ka og kahoy sa pagluto o butane ug uban pa nga mga gikinahanglan aron masodlan ang tiyan.

Maayo lang kaayo moingon kining mga hinampak gabuotbuot sa ilang kwentada nga morag nasayod sa kahimtang sa mga tawo nga naglisod. Maayo man sila kay mga datu man ug nag-diet seguro pwede ra nga dili mokaon pero kompleto man sila sa bitamina.

Kitang mga pobre nga kayod sa trabaho mobati man gyud ta og gutom nga gikinahanglan nato aron magamit nato ang atong kusog.

Atol sa akong pakighinabi sa usa ka opisyal sa NEDA-7 nga dili realistic ang unang nabungat sa ilang opisyal didto sa kaulohan kay posibleng outdated kadto ug gikinahanglan nga tun-an og balik ang kahimtang karon kay daghan na kaayo ang nausab ilabi na nga nakasinati kita og inflation, ang kahimtang kaniadto lahi na karon.

Literal nga wala maghimo sila sa ilang assisgnment, mora’g mga bata nga nagbolakbol sa iyang assignment ug dihang gipa-report na sa maestra nagpataka nalang og yawit sa sayop nga tubag.

Ka dakong kauwaw sa ilang gihimo diin sila pa gyud ang ahensya nga gitahasan sa pagtimbang timbang sa isyu nga naglambigit sa ekonomiya sa nasud.

Sakto man o sayop ang data nga ilang gipagawas apan usa lang ang buot ipasabot niini nga padayon gihapon natong nasinati ang problema sa pagkaon nga mismo ang mga anaa naglingkod sa gobiyerno mora’g napasmohan nagpataka nalang sa ilang gihimo.

Milaom ang mga tawo nga mobarato ang bugas ngadto sa tag P20 ang kilo apan hangtud karon nagpabilin pa kining damgo.

Subo palandungon nga ang gipasiatab nga food security program sa kagamhanan wala pa gyud mabatyagi mga tawo nga walang wala gyud o kadtong gitawag nga mokakha pa ayha makatuka.

Duna man seguroy panagsa nga band aid program sama sa kadiwa apan talagsa ra man.

Ang problema karon, daghan ang hambog gustong ipagawas nga nilambo na ang nasud.

Daghan na ang nakalingkawas sa kapobrehon apan imagination lang kining tanan kay daghan pa ang mga tawong gipanggutom.