Cebu-Bohol Bridge

Kapin sa 600 ka depektoso nga mga timbangan gipangguba atubangan sa Cebu City Hall kagahapon sa buntag.

Sus, kadaghan tawon sa mga pumapalit og bisan unsa diha sa atong kamerkadohan nga nabiktima sa maong mga tikasan nga timbangan.

Gisaksihan ni Cebu City Acting Mayor Raymond Alvin Garcia ang pagpangguba sa maong mga depektosong timbangan nga gilata pinaagi sa backhoe.

Gimandoan ni Garcia si Engr. Robert Barquilla, ang pangulo sa Office of City Markets, nga padayonon ang pagpangsakmit sa mga depektosong timbangan.

Klarohon hinuon nako nga ang ubang tindera way tinguha nga manikas apan ang ilang mga timbangan, mangaguba gyud tungod sa kadugay’ng pagsige’g gamit.

Apan di sab kalikayan nga duna gyuy mga tindera nga tuyoon gyud sa pagmaniobra ang ilang mga timbangan aron nga makaganansya sila’g dako.

Anha lang sa Pasil Fish Market, ug bisan na sa ubang mga merkado, pagbantay gyud mo sa ubang mga maniobra.

Kamong tigpalit og mga isda, unya plastik nga balde ang gamiton sa mga tindera nga timbangan sa mga isda, kon dili mo magbantay, apil ang gibug-aton sa balde ang inyong mabayran.

Ambot kon ang atong kamerkadohan duna pa bay public weighing scale, aron ang atong mga pumapalit, maka-check kon ang ilang pinalit husto pa sa timbang.

Isugyot nato kini kang Konsehal Junjun Osmeña nga himoon ni kay siya man maoy gitahasan ni Raymond nga mo-supervise sa atong kamerkadohan.

Ako unta ni nga mahisgotan kon dili pa kanunay’ng busy si Konsehal Junjun, apan di na man motubag kon imong kontakon bahin sa among interview sa Sugboanon Channel.

* * *

Wa na gyuy timik kon unsa nay kalamboan niadtong plano nga maghimo’g karsada nga anha mag-agi sa kilid sa atong kabukiran alang sa mga sakyanan nga gikan sa southern towns paingon sa norte nga dili na moagi sa Cebu City.

Maayo unta og mahunahunaan kini sa atong mga Sugboanong kongresista, ilabi na ang mga kongresista sa Cebu City, kay usa kini sa paagi pagsulbad sa grabeng traffic dinhi sa siyudad.

Laing pangandaman sa atong mga opisyal mao ang plano nga pagbutang og taytayan nga magdugtong sa Cebu ug Bohol kay kon kini matuman, mosamot kadaghan ang mga sakyanan nga manganhi sa Cebu City.

Basin baya kon unya na kamo mohimo’g lakang niini kon anaa na ang problema. Kinahanglang mangandam daan kay si magpapatigayon Manny Pangilinan agresibo gyud nga matuman na ang iyang pangandoy paghimo’g taytayan nga magdugtong sa Cebu ug Bohol.

Gikuyawan ko nga unya na mo manguros kon maigo na sa kilat.