Inat-inat sa balaod
Kon tinuod ang pangangkon ni kanhi Customs Intelligence Officer Jimmy Guban nga napriso siya tungod sa pagkasakmit sa P11 bilyones nga shabu sa magnetic lifters nga iyang gibasol sa mga paryente ni kanhi Presidente Rodrigo Duterte, managsama ang ilang kahimtang ni kanhi Senador Leila de Lima.
Ang kalainan mao nga ang mga kaso ni de Lima nakaangkon og kalibotanong atensiyon ug niresulta sa iyang pagka-absuwelto. Sa pikas nga bahin, wala mahibaw-i sa publiko nga ang kaso ni Guban na-inat og upat ka tuig ug niresulta og sentensiyang pagka-priso tibuok kinabuhi.
* * *
Ang bakak nga mga ebidensiya ug mga testimoniya batok ni de Lima gipasiugdahan nilang kanhi Presidente Rodrigo Duterte ug kanhi Justice Secretary Vitaliano Aguirre. Gisawo ang prosekusyon ni kanhi Justice Secretary Menardo Guevarra human sa resignasyon ni Aguirre niadtong 2018.
Si Guevarra na ang tagdumala sa Department of Justice (DOJ) sa pagpasaka og kasong illegal drug importation batok ni Guban. Kinsa ni-atubang sa mga kongresista niadtong Biyernes ug nipasangil nga gikonbikto siya tungod sa inimbento nga mga ebidensiya nga gitumong sa pagpanalipod sa tinuod nga mga utok sa krimen.
* * *
Laing seryusong mga pasangil ni Guban nga makapahimutang sa pagduda sa kaligdong ni Guevarra:
Wala tahura sa DOJ ang iyang mga katungod bisan gipaubos sa Witness Protection Program (WPP); ug
Gipasaligan siya sa duha ka opisyal sa National Bureau of Investigation (NBI) nga ubos sa DOJ–kanhi Director Dante Gierran ug Deputy Director Vicente de Guzman Jr.–nga dili siya ikiha kon mopirma sa dokumento nga mopasangil ni kanhi Senador Antonio Trillanes nga maoy utok sa shabu shipment.
* * *
Isip solicitor general ni Presidente Ferdinand Marcos Jr., si Guevarra hingpit nga nikalawat sa baruganan ni kanhi Presidente Duterte nga walay hurisdiksiyon ang International Criminal Court (ICC) sa pag-imbestigar sa mga pasangil sa laktod nga pinatyanay nga nahitabo sa katuigan nga sakop ang Pilipinas sa ICC sa 2011 hangtod sa 2019.
Pero dihang nabungkag nang UniTeam sa mga Marcos ug mga Duterte, si Guevarra nibalitok nga dili kapugngan ang ICC Prosecutor pakighinabi sa mga saksi sa gipasangil nga crimes against humanity batok ni Duterte. Hinaot nga dili maigo si Marcos sa inat-inat nga tan-aw sa balaod ni Guevarra.
* * *
- Latest
