Aseras

Upat ka adlaw na ang milabay sukad sa kamatayon sa usa ka inahan nga nanganak sa aseras diha sa General Maxilom Avenue sa Barangay Kamputhaw apan way bisan usa sa mga opisyal sa dakbayan sa Sugbo ang akong nadunggan nga nagpakabana pagsusi unsa gyuy tinuod nga nahitabo.

Tingali tungod kay ang 39 anyos nga si Jennifer Tampus, taga Sitio Tabay Lawom, Barangay Tisa kabus intawn ug timawa.

Apan tugoti nga mangahas ko pagdapit sa pagtagad sa mga opisyal sa syudad nga mohimo og pakisusi sa posibling pagpabaya sa mga miresponde nga medical personnel hinungdan sa kamatayon sa inahan.

Matud sa report, alas siete sa buntag niadtong Miyerkules, Agosto 14, nanganak si Tampus daplin sa karsada.

Dunay traffic enforcer nga nakabantay og mitabang niya. Diha puy usa ka nurse nga naagi sa dapit nga mitabang apan giingong luya na kaayo si Tampus samtang nag-ong-ong na ang bata sa iyang pwerta.

Dihay miabot nga ambulansiya aron unta madala sa tambalanan si Tampus apan giingong nagdumili kini. Gikarga na unta kini  sa ambulansiya apan gipakanaog sa mga niresponde nga mga medical personnel kay kuno mipirma og waiver nga di siya magpahatod sa tambalanan.

Bisan og klarong naglisod ug delikado ang pasyente gipasagdan sa mga medical responders nga magpabilin sa sidewalk si Tampus hangtod nga nakabsan sa kinabuhi lakip na ang anak niini.

Tugotan ta nga nagdumili si Tampus pagpahatod sa tambalanan, apan ang mga medical responders maoy mas labaw'ng nasayod unsa ka delikado ang kahimtang sa pasyente.

Ang angayan nilang gibuhat mao nga gihatod gyud sa emergency room ang pasyente ug bahala na ang tambalanan i admit ba o dili.

Kun tinuod nga nagdumili pagpahatod sa tambalanan si Tampus, ang posibleng hinungdan niini mao nga nahadlok ni sa bayranan.

Kun kahadlok man sa bayranan sa hospital maoy nagtukmod ni Tampus nga nagdumili pagpahatod sa hospital, tingali dunay dakong kakuwangan ang kagamhanan pagpasabot sa libreng mga serbisyo niini.