EDITORYAL - Pag-abusar sa gamay’ng gahum
![EDITORYAL - Pag-abusar sa gamay�ng gahum](https://media.philstar.com/photos/2024/08/16/banatoon_2024-08-16_21-15-01.jpg)
Human sa lima ka tuig, naangkon na sa pamilya sa kaniadto kadete sa Philippine Military Academy ang hustisya sa pagkamatay sa ilang anak sa mga kamot sa upper classmen nga miabusar sa ilang otoridad niadtong 2019.
Ang Baguio Regional Trial Court (RTC) Branch 5 mihukom nga sad-an ang mga kanhi kadete sa kasong murder ug palapas sa Anti-Hazing Law nga niresulta sa kamatayon sa kadeteng plebe nga si Darwin Dormitorio.
Gawas nila aduna nay laing usa ka kadete nga una nang nakombikto sa slight physical injuries sa nahitabo gihapon ni Dormitorio.
Makaluluoy ang nahitabo kang Dormitorio kinsa taas unta pangandoy sa gipiling propesyon nga mamahimo usab untang opisyal sa militar sama sa iyang amahan.
Dako gyud ang pagmahay aning mga nakombiktong kadete ilabi na kadtong duha nga nahukmang mabilanggo og reclusion perpetua o 40 ka tuig nga pagkabalhog sa prisohan.
Apan sa habig sa mga kombiktado, unsa pa may kaugmaong nagpaabot kanila ini og gawas nila sa prisuhon sa edad nga hapit na sila mag 60 anyos?
Pagkaanugon sa ilahang talento ug kinaadman nga maoy puhonan nganong nakasulod sila sa maong primera klaseng eskuylahan sa nasud.
Dili tanang kabataang Pilipino ang mahatagan og kahigayonan nga madawat sa PMA tungod sa kahigpit sa pagpili nila og kadete.
Labaw sa tanan, nausik ang ilang kinabuhi ug napunta sa wala ang mga pangandoy sa ilang mga ginikanan nga makita silang malampusong nakatiwas sa PMA. Ikapasigarbo gyud unta sila og maayo, apan karon, nawala na.
Magsilbi unta kining leksyon sa mga upper classmen sa PMA ug ingon man sa ubang military o law enforcement academies sa nasud. Dili moabusar sa gamay nga gahum ug otoridad.
- Latest