Lanog nga kakak
Ambot unsa pay sunod nga mga pakauwaw nga himoon ni Senador Bato dela Rosa tungod sa labihang kahadlok nga ipadakop na siya uban ni kanhi Presidente Rodrigo Duterte sa International Criminal Court (ICC) tungod sa laktod nga pinatyanay sa kampanya batok sa ilegal nga drugas.
Human siya nihangop sa pasalikway ni Presidente Ferdinand Marcos Jr. sa ICC, gipasanginlan niya silang Justice Secretary Boying Remulla ug Solicitor General Menardo Guevarra nga nisukwahi sa baruganan sa presidente. Mora’g siya na lay wala mahibawo nga nakahukom nang Malakanyang sa paglawog nila sa tirong.
* * *
Gipasanginlan niya si House Speaker Martin Romualdez nga nangumbinser sa mga polis sa pagsaksi batok niya ug sa kanhi presidente sa pasangil sa crimes against humanity nga gi-imbestigar sa ICC.
Nahunghongan tingali nga walay balaod nga malapas ang mga mobisto sa mga sekreto sa ilang drug war, nagkara-kara pagpahibawo si dela Rosa nga mopasaka siya og balaudnon nga modili sa mga ahensiya sa gobyerno, apil nang kapolisan, sa pagtabang sa ICC. Ambot may nakasulti ba niya nga walay kahigayonan nga ipasar sa Senador ug sa House ang iyang balaudnon.
* * *
Si dela Rosa gigamit ni kanhi Presidente Duterte sa pagpa-goryo-goryo sa umaabot nilang pagkabalhog sa prisohan sa ICC. Mas bantang ang ilang panghudlat sa administrasyon pinaagi sa nabanhaw niyang pamalikas sa ICC ug sa nagyagaw nga mga pagpangatake sa iyang mga anak–silang Bise Presidente Sara Duterte Carpio, Kongresista Paolo Duterte ug Davao City Mayor Sebastian Duterte.
Naglaom nga ang ilang pagsaba-saba makakumbinser sa ilang mga dumadapig pagpasiugda og people power–nga gilaomang maka-aghat sa loyalista nilang kapolisan ug kasundalohan paglusad og kudeta–aron pagpanalipod nila.
* * *
Pero ang tanang maniobra sa mga Duterte nisumbalik nila. Ang desperadong mga sulti ni dela Rosa nibisto sa higante nilang kahadlok. Istorya ra diay ang nangaging mga pasalig nga andam moatubang sa tanang namasangil og krimen sa ilang administrasyon.
Karong may kahigayonan na sa pagpanalipod sa ilang kaugalingon kon mahinayon ang husay sa ICC, nilanog ang ilang kakak. Wala gyod tingali magpaabot nga moabot ang adlaw sa panudya. Wala gyoy tingali magtuo nga kapaninglan sa bangis nilang mga krimen. Hinaot nga bisan uwahi na kahatagan og hustisya ang mga biktima.
* * *
- Latest
