Pwede bang mareklamo ang magpasingit sa FB?

Dear Atty. Divine,

Duna koy pangutana labot sa akong silingan nga magsige og post sa iyang Facebook wall og klaro kaayo nga ako ang iyang gipasingitan og estorya. Nagka-atubang na mi ana niya before sa barangay tungod sa problema sa boundary dispute kay namasangil siya nga milapas daw ang among koral sa ilang property. Apan sa dihang nag-abot na mi sa barangay misugyot ang opisyal sa barangay nga ipa-survey ang among property aron pagsuta kun nakalapas ba gyud mi apan kinahanglan nga magtunga mi sa gasto sa survey. Andam ko nga mobayad sa katunga apan siya di man mobayad mao nga wa gyud masulbad ang maong issue. Karon adto siya magsige og post sa Facebook og mga negative comments, ug klaro kaayo nga ako ang iyang gipasingitan og estorya. Mamahimo ba nako siyang ireklamo? Daghang salamat. -- Fely

Dear Fely,

Kun dili ra libelous ang gipang post sa Facebook mamahimo ra nimo siyang pasagdan kay kun dili nimo siya tagdon posible nga mohunong ra na siya sa pagpost. Apan kun libelous na kaayo ang iyang mga mensahe ug klaro kaayo nga ikaw ang iyang gipuntarya sa maong post them mamahimo nimo siyang ireklamo sa inyong barangay. Mas maayo nga inyong i-settle ang maong issue sa barangay ug magpirmahanay mo og kasabutan nga dili na mag post og mga negative comments sa usa’g usa. Apan kun di mo masulbad sa barangay, then mamahimo kang mopasaka og kasong Cyber Libel batok sa imong silingan. Thank you and God bless. -- Atty. Divine

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.