EDITORYAL - P21.3 budget kada kaon, di paigo

Ang National Economic Development Authority miingon nga ang P21.3 nga budget kada kaon sa usa ka tao dili makonsiderar nga pinobreng kaon.

Si NEDA Secretary Arsenio Balisacan namayahag niini atol sa gipahigayong Development Budget Coordination Committees sa Senado.

Nagpasabot kini nga ang tawo mogasto og P64 kada adlaw.

Nangangkon ang NEDA nga misaka gani kini gikan sa P55 kada adlaw sa nakalabay nga tuig 2021.

Kini nga budget nakapasiga tingali sa mga mata sa mga senador ug sa ubang mga nanambong sa maong tigum, kay sayud sila sa ilang kaugalingon nga di paigo kanila mogasto lang og P21.3.

Gani sa mga pungko-pungko diin sagad mangaon ang mga ordinaryong mamumuo ug mga estudyante, dili paigo kining kwartaha aron mabusog.

Ang puso lang daan tag P10 ang buok, ang lumpia nga tawgi tag P7 o tulo P20, mao ni ang pinaka barato nga sud-an.

Di man sab mahimong kada kaon ingon ana ra gyud ang kaonon og balikbalik.

Hinuon makadaginot kun adto nalang sa balay mokaon o ba kaha magbalon. Kay kun sa balay, makakaon man ang uban kabanay.

Apan sa minimum karon nga suholan nga wa kaabot og P500 ang adlaw, unya usa ray nagtrabaho sa usa ka pamilya, kuwangon ra kini, ug kanan P21.3 nga budget kada usa, dili na mahitabo.

Samot na gyud kun kini daghag anak o gipakaon, dili lang man pagkaon ang kinahanglang bayaran, naa pay mga bills, mag unsa nalang.

Naanalisar unta sa mga senador ang ilang papel ug kaakohan ngadto sa katawhan.

Ang kasamtang minimum wage dili gyud paigo. Kinahanglan sab nga mangita ang gobiyerno og pamaagi aron mapaumentohan ang suholan dili lang sa gobiyerno kundili, iapil gyud ang tanan aron dungan mabulahan.