100 porsiyento sulbad

Gipahibawo ni Col. Antonnieto Canete nga 100 porsiyento na nga nasulbad sa kapolisan ang kaluha nga pagpanulis nga nahitabo sa dakbayan sa Sugbo. Kini human na nailhan nila ang mga tulisan nga mitulis sa duha ka jewelry shop sa may Barangay Ermita.

Matud pa sa hepe sa kapolisan¹ sa dakbayan sa Sugbo nga ila nang ipasaka ang kaso batok sa mga tulisan ugmang adlawa, Biyernes. Iya usab nga gitugan nga anaa na sa 80 porsiyento ang ilang pagpanghipos og ebidensiya batok sa mga gidudahan nilang mga tulisan.

Kompleto na diay ug sulbad na ang kaso sa pagpanulis kun mailhan na ang mga gidudahan nga mga tulisan bisan pa og wala pa nila kini nadakpan? Ang pag-ila lang ba diay sa mga tulisan ang basihan sa sa 100 porsiyento nga pagkasulbad sa kaso? Wala diay labot niini ang pagdakop sa mga kriminal?

Ang trabaho sa polis dili lamang kutob sa pag-ila sa mga kriminal kun dili lakip usab niini ang pagdakop sa mga kriminal.

Sa laing bahin, ang pagsulbad sa krimen kinahanglan nga makabasi kini sa pagkakonbikto sa akusado dili kay sa pagkasikop lamang usab sa suspetsado.

Duna nay daghang kaso nga ang mga akusado gipang absuwelto sa husgado tungod sa dili ligon nga ebidensiya nga bunga sa dinali-dali nga paghipos og ebidensiya sa kapolisan.

Ang kaso ni Charina Relativo kansang patayng lawas napalgang patay ug hubo sa lawak nga iyang giabangan diin ang akusado nga si Darren Alderson Tejano Cui miangkon sa krimen nga iyang gihimo 100 porsiyento na pud kuno nga sulbad, matud pa sa kapolisan.

Pero mak konbikto kaha sila ni Darren? Mosalir kaha sa husgado ang gipirmahan niini nga extra-judicial confession nga aduna may daghan nga mga pagduda niini?