Kuratong Baleleng

Human masikop ang usa sa walo ka mga suspetsado pagtulis sa duha ka tindahan og alahas diha sa Barangay Ermita, Cebu City usa ka semana  na ang milabay, kumbinsido ang kapolisan sa dakbayan sa Sugbo nga ang mga salin sa notadong Kuratong Baleleng Robbery Group maoy responsible.

Sigun sa kapolisan nga tulo sa mga tulisan maoy dunay direktang kalambigitan sa criminal syndicate nga gitukod sa mga Parojinog didto sa Mindanao samtang ang laing lima nagsilbing mga local contact.

Ang grupong Kuratong Baleleng natukod niadtong dekada 80 isip usa anti-communist group apan nahimong usa sa mga gikaintapang criminal syndicate sa nasud nga nalambigit sa tulis, smuggling, kidnap for ransom ug uban pang matang sa illegal nga kalihukan.

Nabungkag ang grupo dihang napatay sa mga awtoridad ang mga lider niini panahon ni kanhi Senador Panfilo Lacson isip pangulo sa Presidential Anti-Organized Crime Task Force nga gitukod ni kanhi Presidente Joseph Estrada.

Nagkabuwag-buywag ang nahabiling mga membro sa grupo—ang uban giingong tua sa kaulohan, samtang ang uban dia sa Sugbo ug sa Mindanao.

Ang istilo sa pagpanulis sa Macy’s Jewelry Store ug sa D’ Gold Chain Jewelry Store niadtong Huwebes, Agosto 8, diha sa may F. Calderon Street, Barangay Ermita, Cebu City diin armado og tag-as nga kalibre ug labihan ka paspas ang paghimo sa krimin usa sa mga nakagiya sa mga imbistigador sa kapolisan aron subayon ang posibling kalambigitan sa Parojinog group.

Uban ang abilidad ug kakugi natultulan sa kapolisan, labi pa sa hepe sa Carbon Police Station nga si Maj. John Libres, ang gigamit nga getaway vehicle. Sigun sa mga CCTV footage usa ka silver gray nga Mitsubishi Adventure ang gisakyan sa mga tulisan.

Dihang gisubay sa kapolisan nahibaw-an nga ang sakyanan nga dunay plaka nga DAB 5200 gipanag-iya sa usa ka polis nga nadistino sa Luzon. Ambot sulagma ba lang nga atol pagkahitabo sa tulis giingong on leave ang maong polis.

Ang kapolisan sa dakbayan mipugong lang una sa pangalan sa maong polis samtang ila pang gipalig-on ang mga ebidensiya alang sa posibling pagpasaka og kaso. Apan ang nagmaniho sa sakyanan nga si Marcial Ponesto, 31, lumad nga taga-Mindanao ug kasamtangang nagpuyo sa Pagsabungan, Mandaue City nasikop na sa kapolisan.

Nihimakak hinuon siyag kalambigitan ug miingon nga igo ra siyang gisugo pagmaneho sa sakyanan. Kun kinsay nagsugo wala pa matino sa kapolisan. Apan sigurado ang mga imbistigador nga apil si Ponesto sa mga nanulis.

Daghang salamat sa kakugi sa kapolisan, apan dako pa silag trabahoon alang sa hingpit nga kasulbaran sa kaso. Hinaot dili silang mo-relax og motuo sa ulog-ulog ni acting CCPO director Col. Antonietto Cañete  nga 70 ngadto sa 80 porsiyento na nga sulbad ang kaso.

Hangtod dili nila madakpan ang tanang nalambigit sa tulis ug mabawi ang mga alahas layo pa kini sa kasulbaran.