In AID of re-election

Mipasaka si House Speaker Martin Romualdez og balaodnon (House Bill No. 10747) nga naglatid nga unom na ka tuig ang termino sa mga opisyales sa barangay ug sa Sangguniang Kabataan sa tuyo nga maseguro nga mapadayon ang nasugdan nila nga mga programa ug proyekto.  Daw gihabolan lang og maayong katuyoan kunohay ang maong balaodnon. Sayod kita kon unsay gamit sa mga barangay ug SK officials sa panahon sa eleksyon. Busa makaingon usab kita nga ang lain nga katuyoan sa maong balaodnon mao nga kini giproponer “in aid of re-election.”  Fezteleern!

BFF diay sa China

Segun sa Philippine Navy, mi-triple na ang gidaghanon sa Chinese military vessels ug mikabat na usab sa 13 ka barko sa Chinese Coast Guard ang nagbahis-bahis karon sa West Philippine Sea.    Daw mibalik na usab pagsiaw ug pagsalida ang Chinese Coast Guard sa atong kadagatan.  Apan segun sa panahom sa akong bilyako nga amigo, “Basta lutoson na gani sa administrasyon si kanhi Presidente Duterte, sama sa pagtugot niini sa ICC nga mo-imbestigar, mohimo usab dayon og kasikas ang China diha sa atong kadagatan?  Kalimot diay mo nga BFF man na si Presidente Duterte ug ang lider sa China?”  Madahaan!

Nawani Nga Prayoridad

Giangkon ni DepEd Secretary Sonny Angara nga dili epektibo ang mga lakang nga gihimo sa gobiyerno aron matubag ang kakulangon sa classroom sa atong mga eskwelahan nga miabot na karon sa 159,000 ka classrooms.  Nagpabilin pa nga tanghaga sa atong mga lider ang kakulangon sa mga classrooms.  Samtang nagpunay ang DPWH og guba-dayon ayo-dayon guba-dayon ayo na usab sa atong kadalanan, nataligam-an usab ang pagbuhat og mga eskwelahan.  Mao kana’y giingon nga, “Sa atong pagsalikway sa panginahanglan sa mga tinun-an, tataw nga nawani ang prayoridad sa kagamhanan.”  Muleeng!

Laksot Pa Sa Hayop

Mipalabang ang Cebu City Council og resolusyon nga nga naghangyo sa CCDRRMO ug sa Department of Veterinary Medicine and Fisheries (DVMF) nga tumanon ang lagda nga gilatid sa R.A. 8485 kon ang Animal Welfare Act.  Tuyo sa konseho nga dili mapasagdan ang mga hayop labi na sa panahon sa katalagman.  Maayo ang katuyoan sa maong resolusyon.  Dili usab angay hikalimtan nga mas mahinungdanon ang kinabuhi sa tawo kon itandi sa mga hayop.   Apan sa higayon diin ang tawo labaw pa kalaksot ang kinaiya kay sa hayop, dili na tingale sila angayan mahimong benepisyaryo sa Animal Welfare Act.  Saoonz!

Wala Na Gyu’y Trabaho

Gimanduan ni acting Mayor Raymond Alvin Garcia ang HRDO sa paghimo’g performance evaluation sa performance sa mga empleyado sa city hall.  Alang sa acting mayor, human na ang gitawag niya og “honeymoon period” busa ipahigayon na ang nasugdan nga “downsizing” or rightsizing sa mga empleyado.  Ni’ng kamandoan sa acting mayor, tataw nga adunay mga empleyado nga dili na ma-renew ang ilang kontrata.  Matud pa sa mga kibitzers sa city hall, “Kadtong mapapha tungod kay gituohan nga walay trabaho, aaw, matinuod na gayod nga wala na’y trabaho.”  Pagkatoytoy!