Kinsa’y tag-iya?

Gibutyag sa kapolisan nga usa ka Mitsubishi Adventure ang get-away vehicle nga gigamit sa mga tulisan sa duha ka baligyaanan og mga alahas nga gitulis sa miaging semana diha sa Carbon.

Ang akong pangutana, kay wa may detalyi niini ang mga reporters, kinsa man ang tag-iya sa sakyanan kay nakita man ang plate niini?

Nganong igo ra man moingon nga giawhag ang publiko nga motabang pinaagi sa pag-report kon makit-an ang sakyanan. Nganong dili man susihon sa Land Transportation Office (LTO) kon kang kinsa to nga sakyanan?

Ako hinuon, dili gyud ko dayon motuo nga ang maong plate number iya gyud to sa maong sakyanan, apan kabahin kana sa paghimo og imbestigasyon.

Base sa plate number nga DAB 5200, nagpasabot ni nga ang maong sakyanan narehistro didto sa Region 4, Southern Tagalog region.

Kon ako’y imbestigador, moadto dayon ko sa LTO, ug pagpatabang pagsusi didto sa ilang counterpart sa LTO Region 4 aron mahibaw-an kinsa’y tag-iya sa sakyanan.

Adtoon dayon sa mga polis ang balay sa tag-iya sa sakyanan nga gihatagan og plaka nga DAB 5200 ug pangutan-on hain ang iyang sakyanan.

Pananglit moingon ang tag-iya nga nabaligya na niya ang sakyanan, tan-awon ang papeles sa pagbaligya kon kinsa ang nakapalit, ug adto na usab didto ang sunod nga follow-up.

Apan kon pananglit ang tag-iya moingon nga guba ang iyang sakyanan nga may plakang DAB 5200 ug anaa ra sa grahe gilawa-lawaan na, aw masabot nato nga buhat-buhat ra kadto nga plaka ang gigamit sa get-away vehicle.

Nakasiguro ko nga ang mga imbestigador sa kapolisan mihimo na niini, apan wa lang kaayo mahimoi og follow-up sa mga nagsuwat sa balita.

Ang report nga nailhan na kuno sa kapolisan ang tulo sa mga tulisan, mora’g kuwang ko niini og pagtoo. Unta, ang imbestigasyon sa kapolisan dili unta mahisama sa pag-imbestigar nila niadtong tulis sa baligyaanan og alahas sa Colon Street.

Hangtud karon ang maong pagpanulis wa gyud kini masulbad sa kapolisan ug wa gyuy na-recover sa mga alahas bisan og usa na lang ka singsing.

Mao kini ang rason nga mogara ang mga tulisan nga magsige na lang og panulis dinhi sa siyudad kay nakabantay man sila nga hinay ang kapolisan mohimo og follow-up.

Kaniadto dihang si Lt. Col. Panfilo Lacson pa ang hepe sa Cebu Metrodiscom, masulbad ra man dayon ang mga pagpanulis, sama sa dakong tulis sa bangko sa Mandaue, tulis sa usa ka bangko diha sa eskina Plaridel ug Osmeña Blvd.

Abtik kaayo ang mga sakop sa Theft and Robbery Section kaniadto nga mohimo dayon og follow-up, ug abagan sa ubang mga special units. Nganong karon hinay na man mo-follow-up?