Bantok nga bakak
Ang US Army naka-dokumento unsa ka-bakakon si anhing Ferdinand Marcos Sr. Bisan ilang gisalikway niadtong 1945 ug 1948 ang duha niya ka petisyon pag-ila sa Maharlika guerilla unit sa ikaduhang gubat sa kalibotan, si Marcos Sr. wala motahan.
Bisan napamatud-an sa mga imbestigador sa US Army nga “distorted, exaggerated, fraudulent, contradictory, absurd” ang iyang pangangkon, si Marcos Sr. padayong niinsistir nga ang iyang Maharlika unit nakalangay og pila ka semana sa paghagsa sa Bataan. Gihulgway sa US Army si Marcos Sr. nga nangugat og pamakak bisan nasakpan nang iyang pangilad.
* * *
Maayong pagkaliwat ang anak nga si Presidente Ferdinand Marcos Jr. Bisan duha ka tuig nang napakyas sa iyang saad paghimong P20 sa kilo sa bugas humay, bisan tanan niyang economic managers nikumpisal nga kon tumanong saad ma-purdoy ang nasudnong ekonomiya pag-subsidize sa presyo sa bugas humay, padayong nipasalig nga hapit nang katumanan.
Bisan gideklarar na sa Korte Suprema nga kawatan ang ilang pamilya, ug bisan P171 bilyones na ang balor sa ilang ilegal nga katigayonan nga nasakmit sa gobyerno sukad sa 1986, padayong nipa-ugat nga wa silay nahimong krimen.
* * *
Natakdan sa talagsaong katakos sa pagpamakak ang giangkon ni Marcos Jr. nga BFF (best friend forever), nga inanay nang nahimo nga mortal nga kaaway sa iyang administrasyon, si Bise Presidente Sara Duterte Carpio.
Bisan nabisto nang kadaghan sa iyang mga guwardiya–kapin 400 segun sa Armadog Kusog, 389 segun sa Philippine National Police, 320 segun sa Department of Justice ug nigasto og kapin sa P500 milyones ang gasto sa niaging duha ka tuig segun sa Presidential Adviser on Poverty Alleviation–namugos pagpatuo nga gihikawan sa iyang seguridad.
* * *
Managsama ang mga ginikanan ug mga anak sa mga Marcos ug mga Duterte:
Nagtuo nga ang bakak kon sigehan og balikbalik makapakumbinser sa kinabag-an (ug makapangangkon nga nakumbinser ang 31 milyones pagbotar ni Marcos Jr. ug 32 milyones pagbotar ni Carpio sa eleksiyon sa 2022);
Maong padayong nibalik-balik sa ilang bakak, bisan nabisto nang dili tinuod, hangtod nga kapoyan ug mohilom na lang ang ilang mga kaatbang; nga mas epektibong mapatuman pinaagi sa
Pagpalapad sa ilang troll armies nga, salamat sa ilang panag-unay, hagbay rang naglinabayay sa bantok nilang mga bakak.
* * *
- Latest
