Di angay kaluy-on

Nagkagot ang akong bag-ang sa kalagot ngadto sa tawo nga mipatay sa usa ka babayeng taga Argao, nga wa pa matagbaw sa iyang pagpatay sa biktima, gisunog pa gyud ang buhok.

Dako ko og pagtuo nga kaila ra ni Charina Baoy Relativo ang nagpatay kaniya didto sulod sa gamay’ng kwarto nga giabangan niya sa Barangay Bulacao kaniadtong gabii sa Agosto 1.

Usa nako ka amigo mipakita kanako sa hulagway sa iyang 27-anyos nga paryente nga nagtrabaho isip tindera sa usa ka mall, ug lumad nga taga Barangay Bulasa, Argao.

Base sa hulagway, hitsuraan si Relativo. Kon kinsa man ang napatay kaniya, angay nga maangkon usab niya ang bug-at nga silot aron mahatagan og hustisya ang biktima.

Matud sa report nga may tawo na nga gi-picked-up ang kapolisan ug gisukit-sukit kabahin sa kamatayon ni Relativo. May usa usab ka basketball player nga giimbitar pag-adto sa police, apan matud pa nga wa moadto.

Kon ibutang nimo nga ikaw ang ginikanan, o mga igsuon ni Relativo nga gihimoan nianang maong pagpangabuso, unsa kaha ang imong mahunahunaan?

Husto bitaw ang giingon sa uban nga daghan na kaayo karon ang way kahadlok sa balaod. Unsaon, ang Pilipinas duna unta’y death penalty sa mga makahimo og bangis nga krimen, apan may mga tawo man sab nga mosaway.

Apan bisan pa og diha pa ang death penalty, hinay kaayo ang pagpahamtang sa silot. Ikaduha, kon pahamtangan man og silot nga kamatayon ang mahukmang sad-an sa bangis nga mga krimen, gamitan pa og injection aron way sakit inigpatay kanila.

Unsaon man pagkahadlok sa mga tawo niana? Mora ka lang og gipakatulog unya hatagan ka og injection nga makapatay.

Sayonan ka, karong bag-o na lang, usa ka taxi driver dinhi sa Cebu City midala sa iyang babayeng pasahera ngadto sa motel, imbes nga ihatud unta sa iyang destinasyon.

Matud sa report sa media nga ang driver nga si Gellan Teves, 44-anyos, nangatarongan nga gidala kuno niya sa motel ang babaye kay aron makatulog?

Unya, nganong gihuboan man ang babaye. Ang babaye giingnan ra kuno sa taxi driver nga dili lang mabalaka kay “wa niya gipasu’d.” Ambot unsay wa niya gipasud.

Kon ako’y matumngan nga akong anak himoan og ingon niini, himoon nako ang tanan nakong mahimo aron mohubas ang mga luha sa mga tawo nga dili mahadlok sa balaod.

Ang tinuod, pabor ko nga silotan og bangis nga silot kadtong mga tawo nga mapamatud-an nga sad-an sa mga kaso. Dili ta angay mabalaka kay makamao motan-aw ang mga huwes kon sad-an ba ang akusado o dili.

Sayonan ka, gipatay pa unya gidaoban pa ang buhos. Unya, taxi driver imbes ihatud ang pasahera niya sa iyang pinuy-anan, gidala hinuon niya sa motel.