Bongbong nagmiting pa, Inday nanghatag na

Duroha ka semana kapin sa wala pa motugpa ang bagyong Carina sa Luzon, giaprobahan na ni Presidente Bongbong Marcos (PBBM) ang hangyo ni Bise-Presidente Sara ‘Inday’ Z. Duterte, pinetsahag Hulyo 9, 2024 – ang paglarga niya uban sa iyang minahal nga pamilya paingon sa Germany.

Personal ang maong biyahe. Busa, personal sab ug gikan sa bulsa sa pamilyang Duterte ang gasto. Pokus si Inday sa iyang trabaho.

Halos, wala na siyay igong panahon nga ikauban sa pagrelaksrelaks iyang bana, ilang mga anak ug iyahang German nga inahan.

Diin likod sa iyang paghatod og mga matinud-anong serbisyo sa katawhan, padayon lang gihapon siyang gigukod-gipiit sa admininstrasiyong Marcos, kinsa hagbay rang nagplano nga ipa-impeach si Inday. Bun-og na intawon kaayo si Inday.

Busa, angay lang mahatagan iyang kaugalingon og ‘breaktime’ uban sa iyang mga pinangga.

Naatol lang gayod nga human sa ilang paglupad nianang pagka ala 1:00 pasado sa kaadlawon, pagka-adlawan sa samang adlaw, Hulyo 24, 2024, mitugpa-hasmag si Carina nga nagdalag makusog kaayong ulan ug mipabaha dili lang sa kasapaan, kondili lakip sa kadalanan, parkinganan ug kabalayan sa Metro Manila ug nagkadaiyang dapit sa Luzon.

Diin, may mga kotseng nalapawan sa tubig, anaay tawong naanod sa sulog ug may pamilyang mitungtong na lang sa atop – nagpanawag: “Rescue, Rescue, hain na mo?”

Niining maong adlaw, makomparar ang pagpamunoan ni PBBM ug Bise-Presidente Inday. Kay samtang si Bongbong nakipagmiting pa sa iyang mga gabinite, ang Office of the Vice President (OVP) nanghatag nag mga kinartong ayuda. 

Usab, ang OVP Kalusugan food truck mihatod dayog mainit aroskaldo ngadto sa 240 ka disaster responders: barangay rescuers, polis, barangay tanods ug uban pang naapektohan sa baha didto sa Manresa covered court, Quezon City. Ug ang hinatdanay sa ayuda nagpadayon.

Mao kini ang tatak Duterte panahon sa kalamidad. Nagpadulong pa lang ang bagyo, naka-ready na tanan: relief boxes, foods ug rescuers. Mao nga bisan tuod og walay Inday sa nasod, nahatod gihapon ang inahanon niyang serbisyo ngadto sa publiko pinaagi sa iyang mga gingsakopan, kinsa iyang gisangonan daan, unsay angay buhaton pag-abot ni Carina?

Mga dalaygong hiyas sa pagpamunoan ni Inday nga layo ra kaayo si Bongbong. Makapasaludo, no?