EDITORYAL - Respeto maoy kuwang

Gipistahan sa social media ang viral video mahitungod sa usa ka transwoman nga matud pa wala pasudla diha sa Basilica Minore del Sto. Niño sa Cebu City tungod nag-shorts lang kini ug wala sab dawata ang iyang passport nga maoy iyang kuhaon og balik ini og iuli na niya ang tapis nga ipahuwam kaniya aron unta siya makasulod sa simbahan.

Sagulsagol ug managlahi ang mga bersyon nga nanggawas diha sa social media kay lagi sagad gibase rapud sa “estorya ni” ug “gikan ni.”

Dugay naman kini nga polisiya sa Basilica, gidili na ang pagsul-ob sa mga manimba o managkot nga mag shorts agi og pagrespeto sa lugar kay kini balaan. Apan makasulod gihapon basta magtapis ug magbilin og ID.

Apan ang maong transwoman dugay nga wala magpuyo dinhi sa Sugbu kay nagtudlo kini didto sa nasud sa Taiwan mao nga wala kini masayod sa polisiya.

Apan nganong wala man dayon dawata ang passport nga balido man kining alternatibo sa ID? Ug nganong kinahanglan pa ang “personal nga pangutana” sa maong policewoman sa Tourist Police kun unsay nakabutang sa passport? Bisan og maayo pa iyang tumong wala kadto sa tukmang panahon ug kun basihan ang video makainsulto ang gihimo sa babayeng polis ug babayeng gwardiya. Mura sila og magbalantay kung ‘straight’ nga babaye o lalaki ang mosulod.

Nganong patubagon man sa maong polis ang gender sa nagreklamo nga pwede man siya ray mobasa sa passport? Usa pa, kanus-a pa nahitabo nga dili balido ang passport isip alternatibo sa ID?  Ang ilang pagtratar sa maong transwoman dili makiangayon ug dili angay mosanay sa kasamtangang panahon.

Nakamugna hinuon og dili maayong talan-awon ilabi na nga gibati og diskriminasyon tungod sa pagtratar kaniya kay siya ‘transwoman’?

Bukas na ang tanan kabahin aning LGBT+Q dinhi sa Pilipinas, dili gyud kalikayan nga aduna pay mga tawong hilasan kanila magtan-aw o kun unsa pay rason.

Nagpabilin nga dominante ang relihiyon sa kinabuhi sa mga Pilipino. Ang Pilipinas usa sa adunay konserbatibong relihiyon sa kalibotan, ang Romano Katoliko nga maoy dominanteng relihiyon dinhi sa nasud.

Kinahanglan tingaling seminaron kining maong gwardiya ug kining polis kun unsay balidong IDs ug labaw sa tanan ang pagrespeto ug maayong pamatasan.