Minor de edad ug krimen

Aduna nay hired killer nga usa ka minor de edad kun tuohan nato ang gitug-an sa utok sa pagpatay sa Administrative Officer sa Barangay Mambaling nga nadakpan sa mga polis nga minor de edad nga giingong hired killer ang iyang gibayaran og napulo ka libo ka pesos aron patyon ang biktima.

Sa  miaging semana gipusil patay usab sa usa ka 16-anyos nga sakop sa Crips Gang ang polis nga migukod kaniya. Mitahan ra hinuon sa mga polis ang minor de edad.

Sigun sa talaan sa Philippine National Police Women and Children Protection Center, mokabat sa 11,228 ka mga minor de edad ang nakahimo og salaud sa tuig 2018. Mas taas kini kun itandi sa 10,338 nga natala sa tuig 2017. Ang gidaghanon sa mga minor de edad nga nakahimo og salaud anaa lamang sa 1.72 porsiyento.

Sa talaan sa kapolisan, ang nag-unang krimen nga nahimo sa mga minor de edad mao ang kawat, physical injury  ug pagpanglugos.

Kinsa man ang responsable sa krimen nga nahimo sa mga minor de edad?

Sigun sa rationale choice, walay laing pakasad-on niini kun dili ang minor de edad mismo kay siya man ang naghimo sa krimin.

Apan may mga eksperto  nga nag-ingon nga may responsibilidad usab ang mga ginikanan tungod kay wala nila matarong sa pagmatuto  ang ilang mga anak.

Kun ang minor de edad nagtungha, may responsibilidad usab ang tunghaan ug mga magtutudlo tungod kay ang tunghaan gikonsiderar nga ikaduhang panimalay ug ang mga magtutudlo ikaduhang mga ginikanan. Laing eksperto ang nag-ingon nga may tulobagon usab ang sociedad ug kultura tungod kay nakatampo kini sa pagkatawo sa minor de edad nga nakahimo og krimin.

Kun kini sila adunay tulobagon sa krimen nga gihimo sa minor de edad, unsay may himoon sa atong awtoridad ani nila? Manghinaut lang ko nga dili na madugangan ang gidaghanon sa mga minor de edad nga makahimo og krimen.