Tunglo Unang bahin

Ang pulong tunglo nagagikan sa linatin nga pulong Maledictus nga diha sa inato nga hubad nagpasabot man og dautang pulong. Mahimo kining moepekto og kaalaut, sakit ngadto sa biktima gumikan sa panabang sa dautan ug sa demonyo. Nahitabo kini gumikan sa kasilag, kasina, pangabubho. Pagahimoon kini pinaagi sa usa ka ritwal og tabang gikan sa nagbansay sa witchcraft. Ang mosunod mao ang detalyado nga pagpasabot kalabot sa tunglo sumala pa ni Padre Gabriel Amorth ang kanhi Eksorsista sa Vaticano nga nipanaw na sa laing kalibutan dili pa lang dugay.

Sumala sa Tumong

1. Tungod sa Gugma (Lumay) aron mahigugma ang usa ka tawo ngadto sa nagtinguha nga higugmaon niini o dili ba kaha aron maguba ang maayong relasyon sa duha ka managhigugmaay o magtiayon kay ang usa kanila gikaibgan sa laing tawo nga buot mosakmit kaniya gikan sa karelasyon niini.

2. Makahilo ug Makalaglag. Tumong niini aron mag-antos ang biktima diha sa iyang panglawas, sikolohikal, ekonomikanhon ug sa kinabuhi sa banay kun pamilya.

3. Gapos/higot. Pagbabag sa mga kalihukan ug bisan gani sa pakiglambigit. Sama pananglit nga diha sa sa pakigrelasyon nga dili gyud molungtad.

4. Pagbalhin kun Transference. Ang paggamit og mga kahimanan nga nisimbolo sa biktima. Kini naglangkob sa paggamit og monyeka o litrato kun larawan aron ipahamtang ang bisan unsang kadaut ngadto sa biktima. Sama pananglit sa pagsangag sa litrato sa biktima aron makabaton siya og sakit sa panit.

5. Pagkadunot kun Pagkadugta (Putrefaction). Paghatag og Balatian ngadto sa Biktima nga mosangpot sa pagkadugta o pagkadunot sa mga internal organ nga magbunga og kamatayon.

6. Aron Masudlan og Demonyo ang Biktima. Sangpiton ang usa ka demonyo aron maoy mosulod ug manag-iya o moangkon sa lawas sa biktima.

Sumala sa Pamaagi

1. Direkta. Diin ang tunglo gipadala pinaagi sa usa ka direkta mente nga paghatag niini ngadto sa biktima pinaagi sa mga kahimanan sama sa tinunglong mga pagkaon, ug ilimnon.

2. Dili Direkta. Pinaagi sa usa ka butang nga nisimbolo sa biktima  sama sa monyeka.

Sumala sa Lihok

1. Pagtusok ug Pagsakit. Paggamit sa mga dagom, lansang, martilyo, kalayo, ug uban pa.

2. Paghikot. Sama sa kadena, pisi ug uban pa.

3. Pagdunot ug Pagkadugta. Ang mga butang nga nisimbolo  sa sa biktima mahimong ilubong, isalibay sa dagat aron dili na makita pa. O ang hayop sama sa manok o baboy nga gihalad ngadto sa demonyo aron maoy mopahamtang sa maong tunglo.

Sumpayan