Pag-aninaw sa Negros

Nindot bitaw nga matag karon ug unya mobisita kita sa mga silingan nato nga probinsiya aron makakita ta sa sitwasyon sa ilang mga lugar.

Gisuwat ko kining mao nga lindog samtang mibisita ko sa Negros Oriental, nga kanhi sakop sa Central Visayas, apan karon nasakop na kini sa Negros Island Region.

Ambot pila kaha ka kilometros ang gilay-on gikan sa Guihulngan paingon sa San Carlos City, apan layo gyud, pero dali ra kaayo ang among biyahe. Abi ninyo og ngano? Paspas ang among dagan kay dili man kaayo daghan ang mga sakyanan nga nagdagan sa karsada.

Nakaingon ko nga pagka nindot unta kon ingon pa niini ang sitwasyon sa Cebu. Pero mao man kuno, dunay miingon nga gubot gyud ang karsada basta ang usa ka lugar mauswagon kay modaghan man ang mga sapian ug makapalit og sakyanan.

Pero mahimong katuohan ang maong pamahayag sa uban, apan posible sab nga dili kaayo gubot ang karsada bisan og daghan ang sakyanan, sama didto sa Bacolod ug Iloilo, kay lapad man kaayo ang ilang karsada.

Dinhi sa Cebu, pwerteng hinaya sa road widening ug road concreting projects nga gipasiugdahan sa Department of Public Works ang Highways (DPWH), sama diha sa mga dapit sa San Fernando paingon sa Carcar.

* * *

Magpalain ta, hisgotan nato ang kabahin sa mga illegal swertres. Abi ko ba og dinhi ra sa Cebu nga mikatap ang illegal swertres, duna man sab diay sa Negros!

Susama ra ang ilang pamaagi nga kunohay ipatoo nga legal ang ilang mga outlets kay dunay marka nga STL, kun Small Town Lottery, apan diay ilegal.

Sama dinhi sa Cebu, daghan sa mga illegal swertres outlets sa Negros anaa ra daplin sa karsada ang gagmay kaayong kahon nga pinintalan og yellow ug sa sulod anaa ang babaye nga nagbantay ug maoy mosuwat sa numero nga paliton sa mga manugal.

Akong balikon nga sayon ra kaayo ilhon ang mga illegal swertres outlets kay wa ni direkta nga koneksiyon ngadto sa Philippine Charity Sweepstakes Office.

Kon mangutana mo nganong gipasagdan ra ni sa mga polis? Ang anaa sa imong hunahuna susama ra sab sa akong hunahuna. Unta ang atong kadagkoan sa kapolisan mohimo og aksyon niining maong ilegal nga mga sugalan.

* * *

Kaniadtong sayo ning buwana, nahimo nakong bisita si Erwin Gok-ong, tsirman sa Cebu Market Vendors Cooperative ug gikomentaryohan niya ang mga isyu nga gustong ipatuman ni City Councilor Junjun Osmeña diha sa atong mga city markets.

Si Osmeña maoy gitugyanan ni Cebu City Acting Mayor Raymond Alvin Garcia sa pagsuperbisar sa atong kamerkadohan.

Alang sa mga hingtungdang vendors, pamatia ninyo ang akong programa nga mag-discuss sa mga isyu sa atong kamerkadohan uban ni Konsehal Junjun Osmeña.

Makita ug mapaminaw kini ninyo karong Agosto 5, adlaw'ng Lunes sa Facebook live streaming

Sugboanon Channel, atol sa programa nga Kumusta Ka Sugbo.