Marcos-SONA gipaningil ni Carina

Notado na si Presidente Bongbong Marcos Jr. (PBBM) sa iyang pagkabakakon. Sukad pa niadtong 2022 election nga pagpangampanya ug sa iyang nangaging State of the Nation Address (SONA) 1 ug 2, diin kutob ra sa drowing iyang gipanulti, Wala gyoy natinuod.

Hinungdan, dismayado halos tanang 31M kapin nga botante, kinsa nagmahay nganong siya pay ilang gibotaran taliwala sa pahimangno ni kanhi Presidente Rodrigo Roa Duterte nga magbantay. Kay adunay usa ka kandidatong milansar pagka-pangulo nga nagumon sa gidiling drugas.

Sa miaging Hulyo 22, 2024, Lunes, si PBBM mipahigayon sa iyang SONA 3. Atubangan sa 2,000 kapin ka mitambong nga politiko sulod sa Batasang Pambansa Complex, Quezon City, nga gigahinag pagkaong mibalor og P20M, siya mipasiatab unsang mga proyektohang makaayo sa nasod ug katawhan ang iyang nahuman? Aniay tipik:

“Mahigit 5,500 flood control project ang natapos na. At marami pang iba ang kasalukuyang ginagawa sa buong bansa.” Naglumba dayon sa pagpamakpak ang iyang mga kongresista, senadores ug mga alipores.

Pero, ambot, nasayod ba kaha sila? Nga mas daghang netizen, vlogger ug viewers, kinsa ang wala na mosalig sa bisan unsay iyawit ni PBBM, ang nangyamiid kanila?

Gani, mas inilog man ang gipasalidang authenticated Pulvoron video nga gipasalida ni pro-good-governance vlogger Maharlika Boldiyakera didto sa Hakbang ng Maisug Rally-Los Angeles, California nga mikabig og 16 million viewers samtang ang SONA ni PBBM mikabat lamang og 550K kapin. Timaan, nga mius-os na pagsamot ang iyang trust rating diha sa iyang kontrobersiyal-wala nay ayong pagpamunoan.

Tiaw bay, duha ka adlaw human sa iyang SONA, hasta si bagyo-Carina nag-wild. Pinaagi sa dala niyang makusog nga ulan, walay kukaluoyng mipabaha ug mipalunop sa nagkadaiyang dapit sa Luzon, labi na sa Metro Manila, diiin may mga balay gianod ug ubay-ubay ang kinabuhing naalaot.

Ingon sa may mensahing gipaabot si Carina ngadto kang PBBM. Ingon sa iya kining gipaningil kon hain na ang gipanghambog nahumang 5,500 flood control project, sanglit may mga sakyanan ug kabalayan man gihapong gipangsanapan? Tinuod kaha kini? Ug kon tinuod, nganong naguba man dayon?

Kay kuno gidam-agan og barko. Kini matod pa ni PBBM. Pastilan, gikataw-an lang siya sa mga nakakon nag tagam niya, uy! Gipakapinan pag lingolingo.