EDITORYAL - Loose firearms

Subo kaayong pamalandungon nga dunay polis nga nakalas sa mga kamot sa usa ka menor de edad gamit ang gituohang loose firearm samtang ang maong alagad sa balaod igo ra nga nihimo sa iyang trabaho bisan og siya off-duty na ug para sab unta kadto sa kaayohan sa maong batan-on nga nakapatay.

Kining nahitabo kang Police Staff Sgt. Orvin Seth Lim Felicio, sakop sa kapulisan nga nadestino sa Police Station 5 sa Mandaue City Police Office.

Nahitabo kini sa dalan P. Remedio sa Barangay Banilad sa Mandaue City tungang gabii niadtong adlaw nga Sabado.  Matud pa sa inisyal nga mga impormasyong gihatag sa kapolisan, gihunongan ni Felicio ang grupo sa mga menor de edad nga naglaag-laag bisan dis-oras na ang gabii.

Gusto lang unta niini nga papaulion ang mga batan-on nunot sa gipatumang curfew ordinance sa siyudad para sa mga menor de edad, kalit kining gipusil sa 16-anyos nga nakaingon sa iyang kamatayon.

Ang batan-on, naa na sa kustodiya sa DSWD human kini gitahan sa mga ginikanan pipila ka oras human sa krimen.   Ang pangutana karon, kinsa may manubag sa maong krimen? Ang maong batan-on nga 16-anyos pa o ang iyang mga ginikanan?

Dako og tulobagon ang mga ginikanan sa mga gipangbuhat sa ilang mga menor de edad nga mga anak diha sa gawas, maayo man o dili.

Sa maong insidente, gisita sa mga nagpatrolyang tanod ang grupo sa mga menor de edad, nagpasabot nga aktibo ang barangay sa pagpatrolya.

Aniay pangutana, asa gikan ang armas sa maong batan-on? Mahimong tinip-igan kini sa iyang ginikanan o mga higala. Napalit ba niya kini, kang kinsa?

Dili ikalimod nga ang Cebu nailhan na nga dunay mga ilegal nga buhatanan og mga armas ilabi na sa siyudad sa Danao sukad pa kaniadto.

Mga armas nga sagad adto napunta sa mga dautan og tumong pagbaton niini. Mga armas nga gipasa-pasa na lain-laing mga kamot nga walay kasayuran ang mga otoridad. Dinhi sa Pilipinas, gibanabanang dunay 700 mil ngadto sa 1.4 milyones ang mga loose firearms karon, apan siguradong mas daghan pa ilabi na kadtong mga paltik. Tungod sa kabarato bisan mga menor de edad makapalit niini.