VP Sara sa Munich
Di mabasol si Bise Presidente Sara Duterte Carpio nga mangandoy nga dunay dakong mahitabo sa Germany, mas maayo kon maglambigit sa 60,000 ka sakop sa Filipino community, aron makapangangkon nga ang iyang biyahe mas mapuslanon kay sa gikatahong pagtan-aw niya sa konsiyerto ni Taylor Swift sa Munich.
Pero wa motabang niya ang kahigayonan. Kinadak-ang mga balita nga among nakuha gikan sa Munich mao nga molusad sila og labing unang alcohol-free nga beer garden ug dunay lokal nga tigom parte sa AIDS. Pulos way labot sa mga biktima sa katalagman nga iyang gitalikdan.
* * *
Gawas sa kakuwestiyonable sa iyang bakasyon taliwala sa duha ka bagyo ug bangis nga habagat, nga ang mayoriya sa mga biktima taga Mindanao, gibugal-bugalan pa gyod nga ang biyahe mahimong moresulta sa iyang kaalaotan.
Kay mahimong luwatan sa International Criminal Court (ICC) ang arrest warrants batok niya ug kanhi Presidente Rodrigo Duterte sa laktod nga pinatyanay sa Davao ug Pilipinas sa 2011 hangtod 2019. Ang Germany sakop sa ICC. Ang pagbalikas sa iyang amahan sa European Union mahimong makahatag sa Germany og dugang insentibo pag-posas niya atol sa konsiyerto.
* * *
Ang Swifties sa Davao, Sugbo ug ubang bahin sa Pilipinas nga nangandoy nga tua sila sa Munich di niya kapugngan pagpakatap sa ilang nahipos nga kasayuran:
Kapin sa P9,000 ang kinabaratohan ug kapin sa P181,000 ang kinamahalan nga tiket (wa hinuon kahibawo tagpilay iyang napalit ug personal bang kuwarta o buhis sa mga Pilipino ang gigasto); ug
Di katambong sa konsiyerto ang uyab ni Taylor nga si Travis Kelce kay nahigot sa training camp.
* * *
Tua sab diay sa Munich ang kadagkoan sa Ministry of Education sa Germany. Pero di kapasangil si Carpio sa pagpakigtagbo nila kay ni-resign na man gikan sa Department of Education (DepEd) sa Pilipinas.
Di sab niya ikasabot ang ilang politikanhong liderato. Si German Chancellor Olaf Scholz masaligon nga modaog si Kamala Harris pagka presidente sa Estados Unidos samtang si kanhi Presidente Duterte tua kapusta ni Donald Trump. Ug ang Germany usa sa labing kusganon nga nagpaluyo sa ka-lehitimo sa pangangkon sa Pilipinas sa West Philippine Sea ug nikondenar sa bangis nga pagpanghasi sa China.
* * *
- Latest
