Lending scammers

Nadiskobrehan sa NBI ang usa ka lending collection scam didto sa Pasay City nga nangilkil og kwarta gikan sa mga nangutang pinaadi sa pagpanghulga ug panghadlok kanila bisan nakabayad na sila sa ilang utang.  Wala gyud diay dautang buhat nga motunhay ni’ng kalibutana.  Makapahinumdum sa naningil sa utang sa iyang silingan nga tungod sa kagahi mobayad niini, iya kini’ng nasultihan nga “Wala kay uwaw, dugay na imong utang pero wala kay bayad-bayad.”  Misulinga ang mangungutang sa pag-ingon,”Ikaw maoy way uwaw kay bisan wala ko’y ikabayad, magsige ka’g paningil”.  Saoonz!

Politiko maoy engineer

Ang disaster scientist ug executive director sa University of the Philippines Resilience Institute nga si Mahar Lagmay miingon nga wala pa’y mga flood control infrastructure sa Metro Manila nga makatubag sa mga dagko’ng pagbaha.  Typical ang maong suliran dili lamang sa Metro Manila kon dili sa ubang dagkong siyudad sa Pilipinas. Sa pangutana ngano nga wala gyud matubag kining maong suliran sa DPWH, mitubag ang akong amigo sa pag-ingon nga, “Basta ang mga politiko na gani mao’y mag-enhinyero, padayon nga makasinati kita’g mga proyekto nga dili tukma sa mga suliran sa katawhan.” Muleeng!

Dili hikalimtan kay utangan

Usa ka 21 anyos nga lalaki didto sa Sagnay, Camarines ang nakabsan sa iyang kinabuhi human siya matumbahi sa punoan sa kapayas samtang nanghugas sa plato, nga miresulta usab sa iyang pagkabunal ngadto sa dakong bato.  Dili gyud nato matag-an ang kutay sa atong kinabuhi.  Ang mahinungdanon nga magbilin kita’g maayong legasiya aron padayon kita’ng mahinumduman bisan sa atong pagtaliwan.  Makapahinumdum sa akong amigo nga namulong kabahin sa namatay nga silingan sa pag-ingon, “Dili sayon hikalimtan kining tawhana tungod sa kadaghan niya’g utang.”  Madahaan!

Hinungdan sa baha

Gituohan sa pipila ka senador nga ang reclamation project sa Manila Bay maoy hinungdan sa taga-tuhod nga baha sa Senate compound sa Pasay City niadtong Miyerkoles.  Apan angayan hinumduman sa mga senador nga sa dili pa aprobahan ang reclamation project, mohimo una ang proponent og Environment Impact Assessment (EIA) nga pagatukion sa DENR-Enviromental Management Bureau una pa ma-aprobahan ang maong proyekto.  Kon moinsister ang mga senador nga hinungdan sa baha ang reclamation project, tataw nga wala mabuhat sa DENR-EMB ang ilang mandato ug nagpiyong lang kini sa pag-evaluate sa EIA sa maong project tungod ba kaha sa mga malingin nga katarungan.  Fezteleern!

Tawgon og skylab

Nangayo og 1 ka tuig nga lugway ang kagamhanan sa dakbayan sa Sugbo sa ilang pag-okupar sa edepisyo nga gipanag-iya sa MCWD, kay nangita pa ang dakbayan og angayan nga kabalhinan sa ilang mga satellite offices.  Mahinumduman nga gisaway sa COA ang paggasto sa dakbayan sa pagrepair sa maong building bisan wala pa’y kontrata tali sa dakbayan ug sa MCWD.  Hinaut nga magkasinabot ang duha ka habig.  Kay kon dili, maingon nato nga sayop ang paghingalan sa mga buhatan nga satellite office.  Pagatawgon na lang kini og skylab.  Pagkatoytoy!