EDITORYAL - LGUs hadlok sa mga negosyante
![EDITORYAL - LGUs hadlok sa mga negosyante](https://media.philstar.com/photos/2024/07/25/banattoon_2024-07-25_22-15-21.jpg)
Ang grabeng pagbaha didto sa Metro Manila dala sa bagyong Carina nakaparalisar gyud sa tanan didto ug sa mga silingan niining mga dapit. Ang Carina gikonsiderar nga usa ka super typhoon tungod sa dala niining hangin ug uwan. Wala kini tinuod motugpa sa kayutaan sa Pilipinas apan ang dala niining hangin ug uwan ingon man pagbira sa hanging habagat nakagrabe sa epekto didto.
Bisan kadtong mga lugar nga dili pirmeng bahaon gilunopan gyud ug nanulog sa kabalayan. Ang resulta, naparalisar ang mga inadlaw-adlaw nga ginbuhaton sa tanan. Way klase, way trabaho sa ubang mga kompanya ug brownouts. Partikular niini ang epekto sa ekonomiya, kada adlaw nga wala magdagan ang komersyo tungod sa baha, brownout ug lapuk ug danyos, milyones ka pesos ang nawala.
Samot na kun ang maong bagyo nitugpa pa sa kayutaan didto sa Luzon, swerte nga didto lang kini sa kalawran sa Pasipiko ug ning mga orasa ang nasud nasab sa Taiwan ang gikusokuso.
Laing peligrong dala aning mga baha mao ang sakit sama sa leptospirosis, cholera ug dengue nga pulos tanan may relasyon sa tubig.
Ang nahitabo didto sa Metro Manila gipangandaman unta og maayo dinhi sa Metro Cebu. Partikular kining tulo ka mga dagkong siyudad, ang Cebu City, Mandaue City ug Lapu-Lapu City nga mga dagkon og populasyon.
Daghan sa mga lugar sa Metro Cebu ang pirmeng lunopan tungod sa mga moawas nga mga sapa, mga kanal nga paspas kaayong malapawan sa tubig tungod sa mga nabara nga basura ug lapok.
Ang uban sa mga kanal niini diha sa mga sudlonong bahin sa mga barangay wala na maatiman kay gipatungan na og mga kabalayan nga pwerte pung hugawana sa mga namuyo. Sa pagkakaron, naningkamot ang mga LGUs sa Metro Cebu nga hawanan gikan sa mga nakabara nga mga basura, lapok, ug estraktura ang mga sapa niini aron dili daling mogawas ang tubig ug mopadulong sa kabalayan ug kadalanan.
Apan dunay daghang mga negosyante nga padayong wala nagpakabana ug walay planong motahod sa balaod, kini tungod sab walay political will ang mga lokal nga mayor pagpatuman sa nalatid sa balaod batok aning mga negosyantiha.
- Latest