Nganong nagpailad na sab
Ug naabtikan na sab sa China ang Pilipinas. Ang Pilipinas maoy unang nakapahibawo nga may nakab-ot nang kauyonan sa hapsay nga pagpatuman sa umaabot nga resupply missions sa mga sundawo sa BRP Sierra Madre sa Ayungin Shoal sa West Philippine Sea (WPS). Pero ang China maoy unang nakahatag sa mga detalye.
Nga, sama sa ilang mga pangangkon sa nangagi nga mga sabutsabot, dili mao ang tinuod nga nasabotan. Ambot unsay problema sa Department of Foreign Affairs (DFA). Gikurhian nila ang pahibawo sa China. Pero padayong nagdumili sa pagtug-an unsay tinuod nga kauyonan.
* * *
Dili ni unang higayon nga nilikoy ang administrasyon ni Presidente Ferdinand Marcos Jr. sa ilang “assertive transparency” sa WPS: Pag-dokumento sa panghasi sa China aron mahibaw-an sa kalibotan.
Naapsan sab ta sa propaganda sa China human sa engkuwentro sa China Coast Guard ug Philippine Navy sa Ayungin niadtong Hunyo 17, kanus-a gibuslotan ang atong rubber boats, gikawat ang mga armas sa atong kasundalohan ug naputlan og kumagko ang usa nila. Imbes ipahibawo ang mga detalye, nipahibawo ang Malakanyang sa panginahanglan sa de-escalation ug gitawag ang panghitabo nga aksidente.
* * *
Human gipanghimakak sa DFA ang pangangkon sa China nga niuyon ang Pilipinas nga mananghid sa sunod nga resupply mission ug ipakita sa China ang tanang suplay para sa mga tripulante, igo lang silang nipasalig nga ang kauyonan nagtahud sa baruganan sa duha ka nasud pag-angkon sa WPS.
Makauuwaw bang mga detalye sa kauyonan nga mahadlok mang DFA nga mahibaw-an sa katawhan? Kon wa nila ibaligya ang atong pagpanag-iya sa WPS, nganong niinsistir man pagtak-om?
* * *
Gipasidan-an nang daan ang DFA sa mga eksperto nga base sa nangaging kasinatian ang bisan unsang sabutsabot gamiton sa China sa paggapos sa Pilipinas sa di makiangayon nilang mga kundisyon ug sa pagpakatap sa sayop nga kasayuran.
Giilad na ta sa China sa 1995 (sukwahi sa ilang pasalig ni Presidente Fidel Ramos, nagtukod sila og baseng militar sa Panganiban Reef), sa 2012 (sukwahi sa nasabotan, gibabagan nilang Scarborough Shoal gikan sa Pilipinong mga mangingisda) ug sa 2016-2022 (gisurender sa Duterte administration ang WPS bugti sa ulug-ulog nga mga pautang), nganong nikubit mang DFA sa bag-ong lipatlipat sa China?
* * *
- Latest
