EDITORYAL - Emergency hotlines sa kadalanan

Ang matag segundo mahinungdanon kaayo para sa mga biktima sa mga aksidente, katalagman, sunog, ug krimen. Mao nga importante kaayong maabtan dayun sila og tabang dihadiha dayun mentras matabang pa.

Sagad maoy hinungdan nga dunay makabsan kinabuhi o modako ang kadaut sama sa sunog, pagdahili sa yuta, baha ug uban pa mao ang kalangay sa pagabot sa mga responders sa tukmang oras.

Ang mga trained nga emergency medical service (EMS) responders o first aiders, kapolisan ug kabomberohan importante kaayong makaabot sa saktong oras aron makatabang mga nagkinahanglan kanila.

Apan usa sa hinungdan nganong dugay silang makatubag sa emerhensiya kay walay nakapahibalo o nanawag kanila nga sila gikinahanglan.

Kini tungod kay dili tanang tawo adunay mga numero sa mga emergency hotlines diha sa ilang mga cellphones aron makatawag dayun sa maong mga ahensiya sa labing daling panahon.

Dunay pipila ka mga lugar nga dunay mga emergency hotlines nga gipintal diha sa mga bungbong ug mga koral, apan kuwang ra kaayo kini ug kini inisyatiba sa mga fraternities ug sororities sa lokalidad.

Maayo tingaling ang mga local government units, ang PNP, EMS, CDRRMO, BFP ug uban pa, mangunay sa pagpamutang og mga emergency hotline numbers sa mga dagkong karatula diha sa kadalanan.

Pwede gani nga ang mga barangay tahasan sa pagbutang niini diha sa ilang mga hurisdiksyon isip kabahin sa ilang kaakohan para sa kaluwasan ug proteksyon ilang mga konstituwente ug sa publiko.

Makatabang kini sa mga tawo panahon sa emerhensiya ilabi na sa mga dapit nga walay nakadestinong mga polis o mga tanod nga maduolan dayun.