Kumusta na ang ang Pilipinas karon?

Usa man gyud ang tinud-anay nga estado karon sa atong nasud? Komusta naman ang mga Filipino nga nagdahum ug naglaum sa mga panaad nga giluwatan sa mga kasamtangan nga opisyal karon sa atong gobyerno dihang nangaplay pa sila aron ibutang sila sa pwesto panahon sa kampanya? Ang tanan nga pangutana sa katawhan wala pa gyud matubag hangtud karon.

Seguro karong adlawa mahatagan kini og katin-awan atol sa laing State of the Nation Address ni Presidente Ferdinand Bongbong Marcos Jr. karong adlawa kong unsa na ang iyang nahimo sulod sa pipila ka tuig niya nga pagserbisyo. Usa sa padayon nga gipaningil karon sa mga yanong Pilipinhon ang iyang gipanaad nga tag 20 pesos nga kilo sa bugas nga hangtud karon wala pa man matuman. Moingon sila nga naa may baratong bugas sa Kadiwa program apan limitado man ug kutob ra sa publisidad kay ang tinood wala kini mabatyagi sa mga tawo nga tinood nga gipanggutom.

Hangtud dili kini mahatagan og katuman ang saad nga baratong bugas magpabilin kini nga motatak sa imahe sa administrasyon nga kutob lang sa saad apan wala sa buhat. Ilad-ilad lang gud unya daghan pud ang nagpailad kay landslide victory gud ang gihatag sa mga tawo ngadto kang PBBM.

Sa bag-o pa ang paglingkod sa administrasyon makasabot kita nga dili ingon niana ka dali ang pagtuman sa iyang saad kay klaro man kaayo nga sumbag sa buwan diin hangtud karon mao gyud ang nahitabo ug impossible gyud kini nga makab-ot gawas lang seguro kong i-take over sa gobiyerno ang galingan o bugasan sa nasud ug mao ang magbuot sa presyo niini. Apan sayod kitang tanan nga dili kana mahitabo. Hinoon aduna pa may pipila ka tuig nga pagdala niya sa nasod basin diay mahatagan kini og katumanan bisan pa man kong imposible.

Komusta na man pud diay ang sitwasyon karon sa kriminalidad sa atong palibot? Ang kampanya sa kagamhanan batok sa illegal nga drugas? Mora’g namingaw man, dilikado ra ba kong hilom kaayo kay dako kaayo kini og buto sa sulod. Ang kanhi mga dagkong sindikato sa drugas nga mora’g mga ilaga nga nagtago sa bangag aron dili masakpan sa kanhi administrasyon nga giisip nga berdugo nila basin og dugay na nga nanggawas ug nibalik na sa ilang negosyo ug mas nigrabe pa kay wala naman silay kahadlokan.

Gawas sa isyu sa peace and order sulod sa atong nasod, mas peligro ang isyu sa gawas. Ang bangi sa Pilipinas ug sa China tungod sa giilogan nga bahandi sa kinaiyahan sa West Philippine sea nga susama sa usa ka bulkan ang kahimtang nga bisan unsang orasa mobuto, simbako mahitabo ang gubat kong dili madala sa malinawon nga pamaagi.

Kuyaw man ang kahimtang karon kay palaban man ang administrasyon kay gasalig nga anaa ang mga kaalyadong nasud. Bisan og anaa pa sila dili gihapon kini assurance nga mapanalipdan ang katawhan kong mahitabo ang gubat tali sa China, unsaon naman lang og sagang nato sa sophisticated nga mga armas nila. Wala kita kahibawo nga dunay armas nga o weapons of mass distruction sa modernong panahon ang ilang gamiton.

Unta mabati nato ang mga kongkretong lakang sa kagamhanan sa pag-address niining mga isyu nga kasamtangang giatubang sa nasud, ang isyu sa pagkaon ug sa kahapsay ug kalinaw sa sulod ug sa gawas sa nasud.