Eksorsismo sa mga Sentido unang bahin

Itunlob sa pari ang iyang kumagko sa gisudlan sa Krisma ug kurusan kining mga mosunod nga bahin sa lawas sa biktima o pasyente. Ang pari samtang maghilog sa mga sentido ang mokuros sa matag sentido ginamit ang santa krisma.

Sa Kilay: Gihilogan ko ang imong mga kilay aron dawaton mo ang Krus sa Ginoo.

Mga Dalunggan: Gihilogan ko ang imong mga dalunggan aron mopatalinghog ka sa mga pagtulon-ang Diosnon.

Mga Mata: Gihilogan ko ang imong mga mata aron makita ug masud-ong mo ang Kahimayaang Diosnon!

Ilong: Gihilogan ko ang imong ilong aron masimhot mo ang kahumot ni Kristo.

Baba: Gihilogan ko ang imong baba aron ilitok mo ang Pulong sa Kinabuhi.

Dughan: Gihilogan ko ikaw sa imong dughan aron motuo ka sa Dios.

Abaga: Gihilogan ko ikaw sa imong abaga aron mapas-an mo ang yugo sa pagpangalagad Kaniya.

Mga Palad sa Kamot: gihilogan ko ikaw sa imong mga palad aron magbudlay ka alang sa Himayang Diosnon.

Mga Tiil: Ghilogan ko ikaw diha sa imong mga tiil aron mosubay ka sa Dalan nga iya sa Dios!

Timan-an sa pari og krus ang tibuok lawas sa biktima o  pasyente sa walay paghikap niini.

Gitiman-an ko ang tibuok mong lawas ug pagkatawo pinaagi sa timaan sa krus sa Ngalan sa Amahan, ug sa Anak, ug sa Anak ug sa Espiritu Santo aron mabatonan mo ang kinabuhi nga walay katapusan ug maangkon mo ang kinabuhing walay katapusan. Amen.

Kinuha ang pudyot nga balaang asin ang pari mohungit niini ngadto sa baba sa biktima o pasyente ang moingon:

Dawata ang asin sa kinaadman, mahimo unta kini alang kanimo nga timaan sa pakighiuli ug magdala kanimo ngadto sa kinabuhing dayon. Amen

Mga katapusang pag-ampo

Pagaampoon kini sa pasyente o biktima

Pag-Ampo Ngadto kang Kristo aron Malingkawas sa Gahum sa Dautan

Pasyente:

Ginoong Jesukristo, Anak sa Dios nga buhi pinaagi sa pahanungdan sa imong tinahud nga Inahan,  uban sa imong mga balaang mga angheles, uban kang San Juan Magbubunyag imong propeta ug mag-uuna ug sa tanang mga apostoles, uban sa mga nagmadaugong mga martir, uban sa mga balaang mga amahan nga nagmantala sa Dios ug sa tanang mga santos uban ang ilang mga pag-ampo. Luwasa ako gikan sa malimbongong gahum sa yawa. Akong Magbubuhat ug akong Dios, nga nagtinguha dili ang kamatayon sa usa ka makasasala hinonoa nga siya maluwas ug mabuhi. Itugot nga ako mabag-o ug maghinulsol, ako nga usa ka makalolooy ug dili takus. Sakmita ako gikan sa mga ngipon sa bitin nga buot nga motukob Kanako ug nga buot monudnod Kanako padulong sa impiyerno  nga buhi. Akong Ginoo ug kahupayan nga gibistihan ka sa lawas nga madug ta tungod ug alang sa akong kaluwasan, luwasa ako gikan sa akong mga kasakitan ug itugot ang kahupayan sa akong kalag. Itisok sa akong kasingkasing aron tumanon ko ang imong mga sugo ug papasa ang tanan kong mga kasal-anan ug hikalimti ang akong kadautan. Madawat ko unta ang imong mga kalipay. Luwasa ako sanglit nagasalig man ako kanimo, Ginoo ko ug Dios ko!

Kinuptan ang Krusipiho ang Pari Moampo  ning Mosunod:

Pari: Ania ang Krus ni Kristo! Pahawa kamo nga Kaaway!

Pasyente: Ang Liyon gikan sa Tribu ni Juda nga kaliwat ni David  nagmadaugon. Aleluya! (balikon sa makatulo)

Samtang hagkan sa pasyente ang Krusipiho siya Mag-Ampo

Pasyente

Bantayi ako O  Ginoo pinaagi sa gahum sa imong Balaan ug makabuhi nga Krus ug ipalayo ako gikan sa bisan unsang dautan.

Sa imong mga kamot Ginoong JesuKristo itugyan ko ang akong kaugalingon lawas ug  kalag, panalangini ako, luwasa ako, hatagi ako sa kinabuhing dayon! (Manguros)

Himaya sa Amahan ug sa Anak ug sa Espiritu Santo. Mahimo unta ikaw O  Dios nga tigpanalipod sa akong kalag, luwasa ako gikan sa pagbanhig nga yawan-on! Ikaw nga Buhi ug Hari, hangtud sa Kahangturan. Amen!

Pari: Balaang Espiritu Umari ka og pun-a sa imong mga gasa ang mga luna nga gibiyaan sa mga dautang espiritu. Hupnga si (Isulti ang ngalan sa pasyente) sa pagtuo, paglaum ug paghigugma. O Ginoong Jesus bisbisi kami sa imong balaang dugo gikan sa among ulo hangtud na sa among lapa lapa aron manalipod kanamo batok sa bisan unsang panimalos nga pagahimoon sa dautang Espiritu nga among nahimamat ning among pag-ampo ug pangalagad. Among gitugyan ang tanan namong nahuptan lakip na ang among banay, mga higala ug kabtangan aron imong panalanginan ug panalipdan. Ikaw nga buhi ug Hari hangtud sa kahangturan. Amen!

Pagahimoon ang katapusang panalangin ingon man ang awit sa pasalamat.

Pari: Ang Ginoo maanaa kaninyo!

Tanan: Maanaa usab kanimo!

Pari: Manalangin kaninyo ang makagagahum nga Dios Amahan, Anak ug Espiritu Santo!

Tanan: Amen!

Pari: Lakaw kamo sa kalinaw ug imantala ang kalingkawasan nga naangkon!

Tanan: Salamat sa Dios!

Awit sa Pasalamat

Salamat Gyud sa Dios Amahan

Salamat Gyud sa Dios nga Anak

Salamat Gyud sa Espiritu

Salamat gyud sa gugma mo!

Apas Sumpay nga Pangutana:

Nganong wala man matak-op o masira sa hingpit ang Occult Third Eye?

Kasagaran madungog nato kining maong pangutana bisan pa man kun nahitabo na ang ritwal ug eksorsismo sa pagtak-op niini. Nga sa ato pa, wala makab-ot ang gitinguhang kalingkawasan ug nakab-ot man hinay ang paagi niini. Padayon gihapong nakasinati og panghasi ang biktima. Ania ang mga posibling mga hinungdan:

1. Adunay pagdumili nga itahan sa hingpit ngadto sa Dios ang nabatonang gahum gumikan sa occult ug divination. Ang garbo ug ang kakawangan maoy laing hinungdan.

2. Adunay tinagoang sala. Gumikan sa kaulaw ug kawalay pagsalig sa Diosnong kalooy. Nakababag usab kini aron makab-ot ang kalingkawasan.

3. Ang dapit ug kahimtang dili makatanyag sa kahigayonan sa pagbag-o sa  kaugalingon. Naglangkob kini sa immoral nga pagkinabuhi, kasilag sa usag usa ug uban pa.

4. Sa kahimtang sa mga kabataan nga dili makahimo sa pagdesisyon alang sa ilang kaugalingon ang mag-agad gyud sa ilang mga ginikanan o sa nagbantay kanila. apan kun ang ilang mga ginikanan o ang nagbantay kanila nahimong ulipon sa occult ug divination mahimong kini usab ang hinungdan nga malisud ang pagkab-ot sa kalingkawasan sanglit sila man ang naghupot sa moral nga gahum ngadto sa mga bata. Duna gihapon kini epekto ngdto sa kabataan.

5. Alang sa mga magtiayon kang kansang mga third eye abli kinahanglang silang duha mohukom nga pasirad-an o itak-op kini sa hingpit. Dilli maayo nga ang usa lamang ang sirad-an sanglit maapektuhan gihapon kini sa usa nga wala kasirad-I.

6.    Kun ang gipuy-an gihugpaan og daghang mga dautang mga Espiritu o severely infested.

7. Pakyas diha sa paghamtong sa kinabuhing espirituhanon labina gyud diha sa relasyon kang Jesus.

8. Ang pagtipig ug pagbaton og mga basura nga mga emosyon sama sa kasuko, pagdumot, kawalay pasaylo ug ang magahi nga pagdumili.

9. Ang paghupot sa mga dili balaang espirituhanong baligtos, mga panaad ug kasabutan tali sa biktima  ug sa mga demonyo nga wala masalikway sa hingpit. Wala hinulsoli ug wala makumpisal.

Pahinumdom:

Walay mahimo ang eksorsista kun ang suliran naglambigit na kini sa disposisyon sa mga biktima o dili ba sa kaso sa mga menor de edad, sa disposisyon sa ilang mga ginikanan. Gikinahanglan gyud ang matinud-anon nga pag-usab sa kaugalingon ingon man ang hingpit nga pagtahan ngadto sa Dios. kinahanglang talikdan gyud ang naandang pagkinabuhi nga maoy hinungdan sa maong kaulipnan. Sa laing bahin kun ang hinungdan kun nganong pakyas ang pagtak-op kun pagsira sa occult third eye gumikan sa gihugpaan nga dapit[1] o dilli ba kaha sa usa ka butang. Nan, gikinahanglan nga ang lugar o butang palingkawason una gikan sa gahum sa mga demonyo. Ang mga butang nga nalambigit sa biktima ang kinahanglang gub-on ug putlon ang bisan unsang kalambigitan niini ngadto sa biktima pinaagi sa pag-ampo aron maputol na sa hingpit ang mga tunglo, konsagrasyon, baligtos ug higot nga naglimin libot ning  maong tinunglong butang o mga butang.

Hingpit nga Pagtak-op kun Pagsira sa Occult Third Eye

Angayan lamang nga ang ipasabot ngadto sa biktima nga ang proseso sa pagtak-op niini usahay hinay ug dunay proseso. Ang kapaspas o kahinay sa pagtak-op niini nag-agad man sa paagi nga ang biktima nihamtong ug nitubo diha sa iyang kinabuhi sa espirituhanong paghamtong ug sa iyang relasyon ngadto kang Jesus ug sa Mahal nga Birhen[2]. Sa laing bahin, ang dautan ang maningkamot usab aron ang biktima mamahimong dili maayo ug malayo sa maong proseso pinaagi sa paghasi niini og mga tintal, paggalgal sa biktima aron manguryoso sa mga tinagong kahibalo ug gahum. Mahinungdanon usab nga ilabay ug isalibay ang bisan unsang mga butang nga dunay dakong kalambigitan sa occult ug divination. Dili mabatonan ang kaayohan sanglit kining mga butanga mamahimong ganghaan sa mga demonyo aron padayong manghasi sa biktima. Kinahanglang gub-obon o dili ba kaha sunogon.

Kun Bag-o Pa lang Nasirad-an nga Occult Third Eye makahinagbo sa tawo nga Abli ang Occult Third Eye Unsay Mahitabo?

Kun bag-o pa lamang nasirad-an o natak-op ang occult third eye sa usa ka tawo ug gikahibalag o gikatagbo niya ang tawo kang kansang occult third eye abli pa mahimong ang demonyo nga nakatapot sa maong abli nga occult third eye ang demonyo nga anaa niini ang mahimong mopadala og mga mensahe pinaagi sa hunahuna[3] o dili ba, mohaling og usa ka sikolihikal nga pag-atake ngadto sa tawo kang kansang occult third eye nasirad-an na. kun mahitabo kini angay buhaton mao ang paglikay sa tawo kang kansang occult third eye abli pa sa gihapon. Kinahang mag-ampo siya sa pag-ampo sa panalipod[4] Likayi usab ang pagtutok sa mga mata sa maong tawo nga abli ang occult third sanglit pagdason lamang kini nga hingtungdan ang nakahupot sa maong abilidad. Hinumdomi kining mosunod:

1.    Ang tawo nga nga abli pa ang occult third eye ang usahay mosulti sa dayag nga nakahupot siya niini. Gikinahanglang dili itug-an ni mohatag sa detalye ang pasyente kalabot sa maong occult third eye nga bag-o pa lamang gitak-opan. Sanglit ang demonyo maninguha nga maabli kun mabuksan kini pagbalik.

2.    Dili tugotan sa pasyente nga si bisan kinsa ang mopandong sa kamot sa iyang ulo[5] bugtong pari lamang ang makahimo ini ug dili ang mga mananambal o albularyo o ni bisan kinsa nga dunay direkta mente nga kalambigitan sa occult.

3.    Pagadid-an kadtong nangangkon nga dunay mga gahum sa occult sa paghikap sa pasyente sanglit mahimong mohimo sila og mga butang makadaut sama sa tayhop, hunghong, yamyam. Pagaisipon kining usa ka matang sa tunglo.

4.    Himoon kun unsay husto ug makiangayon. Naglangkob kin isa pagputol sa tunglo ug dili balaanong gapos kun higot, o dili balaanong konsagrasyon ingon man ang pag-ampo sa pag-ampo sa pagpanglinis[6]

5.    Ang mga apohan ingon man ang mga ginikanan makahimo pagpanalangin sa ilang mga anak o apo ginamit ang gamhanang ngalan sa Ginoong Dios ug dili pinaagi sa bisan unsang orasyon. Ipagamit ang mga sakramentales ug ipasul-ob sa anak o apo ug likayan ang paggamit og mga anting-anting, habak ug uban pa nga walay pagtugot ug bendisyon sa simbahan.

6.    Kun padayong nasinati sa hingtungdan sa dautang presensiya sa mga dautang Espiritu kinahanglang manlimbasog siya sa pag-ampo ug sa hustong paggamit sa mga sakramentales inubanan ang debosyon ingon man ang pagduol sa mga sakramento adlaw adlaw sa iyang kinabuhi. Labaw sa tanan maningkamot siya nga iyang likayan ang pagpakasala ug kinahanglang magpuyo kanunay diha sa kahimtang sa grasya.

Madugay man tuod ang pagtak-op sa occult third eye apan wala kini magpasabot nga halayo ang grasya nga gikinahanglan alang niini. Hinumdomi maluloy-on ang Dios ug dili siya buot nga ang tawo mamatay ug maalaut gumikan sa sala kun masalaypon sa kinabuhi.

[1] Severe local infestation

[2] Gikinahanglanon gyud  kini kaayo alang sa hingpit  nga kalingkawasan.

[3] Nagpasabot kini og telepathic messages.

[4] Mahimong gamiton ang pag-ampo nga naa sa Catholic Handbook of Deliverance Prayers ni Padre Jose Francisco Syquia, pahina 62.

[5] Pray over

[6] Tan-awa ang pahina 100-102 nga anaa sa Catholic Handbook of Deliverance Prayers ni Padre Jose Francisco Syquia.