Happy birthday, Freeman!

Happy Anniversary sa The Freeman, the oldest daily newspaper in Cebu. Atong klarohon nga “daily newspaper” kay dunay mga nag-una nga mantalaan kaniadto, apan dili kada adlaw mogawas.

Karong adlawa, magsaulog ang mga kawani sa The Freeman sa ika-105 nga tuig gikan sa pagkahimugso sa mantalaan kaniadtong 1919.

Dako ang akong pagpasalamat sa The Freeman kay usa kini sa nakabaid pag-ayo sa akong kaisipan, gikan sa pagka news correspondent, staff news reporter, assignment editor, ug gibalhin ko sa Banat News isip associate editor hangtud sa 2018.

Saludo ko sa akong mga editor, ilabi na ni Mr. Juanito V. Jabat ug ni Mr. Noel Pangilinan nga gihatagan ko nila og higayon nga makasuwat og opinion column sa The Freeman ug Banat News.

Garbo kaayo nako nga sa tanang news reporter kaniadto, ako ra’y gihatagan og higayon nga makasuwat og opinion column sa The Freeman ug sa Banat News.

Mibalibad gyud unta ko sa tanyag ni Sir Noel nga magsuwat ko og column sa The Freeman, apan gipugos gyud ko niya kay gusto siya og mga expose sa kapolisan.

Pinaagi sab sa The Freeman, gipadala ko og 10 ka adlaw nga Investigating Corruption Course nga gipasiugdahan sa Philippine Center for Investigative Journalism (PCIJ).

Tungod niini, nakatampo kaayo kini sa akong kaalam sa paghimo og imbestigasyon. Apan ang labaw gyud nako nga dili makalimtan, dihang ang mga editor sa The Freeman, dako kaayo’g pagsalig nako dihang gidestino ko nila isip court reporter.

Dili basta-basta ang pagka court reporter kay kinahanglan nga dili ka masayop sa imong mga ipanuwat nga balita, kay i-contempt ka sa huwes ug i-subject ka og subjudice.

Sa kapin duha ka tuig nako nga nadestino sa korte, kaluoy sa Ginoo, wa gyud ko masayop sa akong mga balita. Kini maoy hinungdan nga bisan sila si Mr. Miguel Belmonte ug Sir Bhoy Mendoza nga maoy general manager, mitugot nako nga bisan og retired na, makapadayon pa pagsuwat og column, ug gipasuwat pa og inadlaw nga sugilanon.

Ginaingon nga mahikalimot pa ang mga bawod sa paghawok sa baybayon, ug mahikalimot pa ang adlaw pagsawop sa kasadpan, apan ako dili gayud mahimong malimot sa dakong natampo sa The Freeman sa akong pagkatawo.

Usa kini sa rason nga dihang mi-apply ko pagka media consultant sa usa ka iladong local government unit (LGU) wa gyud isalikway ang akong application ug girespitohan ko sa ubang nakong mga kauban.

Usbon nako, congratulations sa mga Gullas, ilabi na ni Sir Johnvic Gullas, ug sa tanang editor sa The Freeman gipangulohan ni Sir Lucky Malicay ug ni Fred Languido nga akong mga suod kaayong amigo.