Palaro 2024 malampuson gihapon
![Palaro 2024 malampuson gihapon](https://media.philstar.com/photos/2024/07/16/banattoon_2024-07-16_22-50-53.jpg)
Malampuson nga napahigayon ang Palarong Pambansa 2024 dinhi sa Sugbu bisan pa man sa mga nanggawas nga isyu ug dautang panahon nga nakaapektar ba o nakatabang sa labok sa mga atleta sud sa sobra usa ka semanang kompetisyon.
Una niini adunay mga nanggawas nga isyu nga makapauuwaw para sa mga Sugbuanon isip host sa Palaro.
Kining mga namintaha nga mga vendors diha sa mga venues ug ang mga taxi drivers nga nangilad sa mga delegado pinaagi sa dili paggamit sa ilang metrohan ug gipapakyaw na man hinuon aron makasingil og dako sa mga nabiktima. Hinuon, naaksyonan kini dayon sa lokal nga kagamhanan sa siyudad ug ingon man sa mga stakeholders sama sa Land Transportation Office-7 ug Police Regional Office-7.
Makiangayon sab nga pasalamatan sa kalamposan sa seguridad ang mga kapin dos mil ka mga polis gikan sa CCPO, LCPO, MCPO, CPPO ug kinatibuk-ang PRO-7, sakop sa Visayas Command, PCG, BFP-7, mga force multipliers ug uban pa kay gisiguro nila ang kaluwasan sa tanan.
Apil sab ang mga civilian local ug national agencies nga duna say tagsa-tagsa ka mga papel nga nakatampo sa kalamposan, partikular niini ang Department of Education.
Kagahapong adlawa, Hulyo 16, 2024 opisyal nga gitak-upan ang Palaro ug kagahapon sab gianunsyo ang kabahin sa isyu sa track oval sa Cebu City Sports Center nga unang gi-report nga kuwang og sukod.
Giklaro sa mga opisyales sa DepEd kagahapon nga nasulod ra sa 400 meter nga standard ang oval, gawas lang sa walo ka lanes nga dunay ginagmay nga kakuwangon sa sukod.
Kaning hitaboa wala pay matumbok gyud kun kinsay sad-an o nasayop o nagkuwang. Apan magbilin kini og dili maayong impresyon para sa mga atleta sa track events.
Hinuon makita hinuon ang ka sensiro sa mga opisyales sa Cebu City, sa Probinsya sa Sugbu ug sa DepEd-7 nga walay gusto nga mahitabo kini.
Maayo lang unta kun ang mga maanindot nga kasinatian sa mga delegado sa ilang pipila ka adlaw nga pagpundo dinhi maoy motatak sa ilang hunahuna kun unsa ka nindot ang Sugbu.
- Latest