EDITORYAL - LGUs hadlok sa mga dato

Niadtong Domingo sa gabii, misulya napud ang tubig baha sa kadalanan sa mga dagkong siyudad Metro Cebu. Kini bisan pa man og gihawanan ug gipalawman na ang mga dagko ug gagmay’ng mga sapa nga natural nga agianan sa tubig matag mobunok ang uwan.

Ang hinungdan, mao kining mga imprastraktura sa mga pribadong tawo o mga pamatigayon nga gitukod diha gyud mismo sa pangpang ug ang uban diha na gyud mismo sa tubig sa sapa gitukod ang poste sa ilang mga edipisyo.

Ang resulta, dili na paspas nga makahalos  ang tubig ug mapundo kini hangtud nga moawas padung ngadto sa kadalanan ug sa mga lupa nga bahin sa mga barangay nga gipuy-an sa mga tawo.

Daan ng problema sa mga local government units ang mga kanal nga nabuni sa basura ug lapok, gipun-an pa gyud aning mga negosyanteng ang bulsa ra maoy gipalabi inay ang kaayohan sa kadaghanan.

Kinahanglan na gyud nga pakitaan sa mga LGUs ang katawhan nga kaya sila niining panalipdan gikan sa mga katalagman dala aning pagsige og baha tungod sa pagawas sa mga sapa.

Kinahanglang iimplimentar sa LGUs kining 3-meter easement zones kay balaod man gyud kaha kini? Nganong sa mga pobreng nagpuyo diha sa mga sapa dali raman kaayo silang napapahawa, bisan ang uban nila nagmagahi man sab.

Nganong sa mga adunahang mga magpapatigayon nga klaro na kaayong nakalapas sa no build zones, nagkinto man ang mga LGU officials pagpabadlong kanila?

Unsa diay, dili diay siguradong kasandigan ang balaod? O basin nagkinto lang kay makatabang kining mga negosyante sa ilang panginahanglan unya sa panahon sa eleksyon?

Bahala nalang og mangalumos ang mga tawo ug mangaguba ang ubang mga negosyo ini’g mosulod ang tubig diha sa ilang mga establisamento?