Termino sa mga opisyal sa barangay maayong patas-an

Giduso ni Senadora Imee Marcos ang balaudnon nga nagtinguha sa pagpataas sa termino sa mga opisyal sa barangay ngadto sa unom ka tuig gikan sa tulo ka tuig lamang.

Ubos sa Senate Bill Numero 2629 nga gipangamahanan sa senadora, ang tanang opisyal sa kinahanglan nga moserbisyo og unom ka tuig. Ang barangay adunay duha ka klase nga opisyal nga mao ang pinili ug tinudlo.

Ang mga pinili nga opisyal mao ang kapitan ug mga konsehales samtang ang tinudlo nga opisyal mao ang sekretarya ug tresurera. Ang motudlo sa sekretarya ug tresurera mao ang kapitan apan nanginahanglan kini sa pagtugot sa mayorya sa mga konsehal. Mao usab ang pagtang-tang kanila sa katungdanan.

Si Senador Imee Marco, ang tsirman sa Senate Committee on Electoral Reforms and Peoples Participation, miingon nga kulang ra ang tulo ka tuig nga termino sa mga opisyal sa barangay alang sa pagpatuman sa tanan nilang mga tinguha subay sa mando sa nasudnon ug local nga kagamhanan.

Ang pagdugang og tulo ka tuig sa termino sa mga pinili nga opisyal sa barangay dugay na. Apan hangtod karon wala pa gihapon kini mahatagi og katumanan tungod kay walay nagpalabang og balaud alang sa maong katuyoan, gawas niini karon. Unsaon man nga mogawas man lang pod kining maong hisgotanan sa mga panahon nga magkaduol ang bugnong lugaynon sa tumong nga mga magbabalaud mohumot ngadto sa mga opisyal sa Barangay.

Pabor ko sa unom ka tuig nga termino sa barangay, dili tungod kay konsehal ko sa among Barangay Quiot dinhi sa dakbayan sa Sugbo kun dili tungod kay haum ug sakto ra gayod kini  alang sa paghuman sa mga proyekto nga ipatuman sa kada Barangay dinhi sa nasud.

Apan akong klarohon, unsa man kining unom ka tuig nga termino sa opisyal sa barangay nga gisugyot sa senadora pinaagi sa balaudnon nga iyang gipasaka, usa lang ni ka termino o puwede pa nga magpapili pag usab ang mga opisyal sa barangay? Mas maayong klarohon kini.